គ្រោះអគ្គីភ័យដ៏ធំដែលឆាបឆេះផ្សារទំនើបមួយកន្លែងក្នុងទីក្រុងការ៉ាជីប្រទេសប៉ាគីស្ថាន មកទល់ពេលនេះ អាជ្ញាធរ រកឃើញអ្នកស្លាប់កើនឡើងដល់ចំនួន ៦៧នាក់។ នេះបើយោងតាមអ្នកនាំពាក្យម្នាក់ដែលមិនបញ្ចេញឈ្មោះមកពីរដ្ឋាភិបាលមូលដ្ឋាន បានឱ្យដឹងនៅថ្ងៃសុក្រនេះ។
ក្រុមអ្នកស៊ើបអង្កេត មិនទាន់បានបញ្ជាក់ពីមូលហេតុដែលបណ្តាលឱ្យមានអគ្គីភ័យនេះនៅឡើយទេ ៦ ថ្ងៃ បន្ទាប់ពីអគ្គីភ័យបានឆាបឆេះផ្សារទំនើប Gul Plaza កម្ពស់បីជាន់ កាលពីថ្ងៃទី ១៧ ខែមករា។
អ្នកនាំពាក្យដដែល បាននិយាយថា សាកសពចំនួន ៦៧នាក់ ត្រូវបានរកឃើញ ខណៈកំពុងស្វែងរកសាច់ញាតិ។
សាច់ញាតិរបស់ជនរងគ្រោះដែលបាត់ខ្លួន បានរិះគន់ថា ប្រតិបត្តិការជួយសង្គ្រោះមានភាពយឺតយ៉ាវ។
អគ្គីភ័យកើតឡើងជាទូទៅនៅក្នុងទីផ្សារ និងរោងចក្រនានាក្នុងទីក្រុងការ៉ាជី ដែលត្រូវបានគេស្គាល់ថាមានហេដ្ឋារចនាសម្ព័ន្ធមិនល្អ ប៉ុន្តែអគ្គីភ័យក្នុងទ្រង់ទ្រាយធំបែបនេះគឺកម្រមានណាស់៕
ដោយ៖ ពេជ្រ
