ប្រធានាធិបតីអាមេរិក លោក ដូណាល់ ត្រាំ កាលពីថ្ងៃសុក្រ (ថ្ងៃទី ១៦ ខែមករា) បានផ្តល់តួនាទីសំខាន់មួយនៅក្នុងតំបន់ហ្គាហ្សា ក្រោយសង្គ្រាមដល់អតីតនាយករដ្ឋមន្ត្រីអង់គ្លេស លោក Tony Blair និងបានតែងតាំងមន្ត្រីអាមេរិកម្នាក់ឲ្យដឹកនាំកម្លាំងសន្តិសុខដែលទើបនឹងបង្កើត។
លោក ត្រាំ បានតែងតាំងសមាជិកនៃ «ក្រុមប្រឹក្សាសន្តិភាព» ដើម្បីជួយត្រួតពិនិត្យតំបន់ហ្គាហ្សា ខណៈដែលលោក លើកកម្ពស់ចក្ខុវិស័យដ៏ចម្រូងចម្រាសមួយអំពីការអភិវឌ្ឍសេដ្ឋកិច្ចនៅក្នុងទឹកដីដែលស្ថិតនៅក្នុងគំនរបាក់បែកបន្ទាប់ពីការទម្លាក់គ្រាប់បែកឥតឈប់ឈររបស់អ៊ីស្រាអែលអស់រយៈពេលជាងពីរឆ្នាំ។
ជំហាននេះបានកើតឡើង បន្ទាប់ពីគណៈកម្មាធិការអ្នកបច្ចេកទេសប៉ាឡេស្ទីនដែលមានបំណងគ្រប់គ្រងតំបន់ហ្គាហ្សា បើកកិច្ចប្រជុំលើកដំបូងរបស់ខ្លួននៅទីក្រុងគែរ ដែលមានការចូលរួមពីលោក Jared Kushner ត្រូវជាកូនប្រសារលោក ត្រាំ ដែលដើរតួនាទីយ៉ាងសំខាន់លើមជ្ឈិមបូព៌ា។
លោក ត្រាំ ក៏បានតែងតាំងបេសកជនពិសេសរបស់លោកគឺលោក Steve Witkoff កូនប្រសារលោក Jared Kushner និងប្រធានធនាគារពិភពលោកលោក Ajay Banga ក្នុងចំណោមអ្នកដែលស្ថិតនៅក្នុង “ក្រុមប្រឹក្សាប្រតិបត្តិស្ថាបនិក” ដែលមានសមាជិក ៧ នាក់ នេះបើយោងតាមសេចក្តីថ្លែងការណ៍របស់សេតវិមាន។
លោក បានប្រកាសថា លោក ជាប្រធានក្រុមប្រឹក្សាភិបាលរួចហើយ និងប្រកាសពីសមាជិកភាពពេញលេញរបស់ខ្លួន ដែលនឹងរួមបញ្ចូលលោក Blair ក៏ដូចជាមន្ត្រីជាន់ខ្ពស់អាមេរិក, លោក Kushner រដ្ឋមន្ត្រីការបរទេស Marco Rubio និងលោក Steve Witkoff ។
លោក Blair គឺជាឥស្សរជនដ៏ចម្រូងចម្រាសម្នាក់នៅមជ្ឈិមបូព៌ា ដោយសារតែតួនាទីរបស់លោក ក្នុងការឈ្លានពានប្រទេសអ៊ីរ៉ាក់ក្នុងឆ្នាំ ២០០៣ ៕
ដោយ៖ ពេជ្រ
