កាសែត Reuters បានអះអាងដោយដកស្រង់ប្រភពអនាមិកថា ការប្រើកម្លាំងយោធាអាមេរិក វាយប្រហារលើអ៊ីរ៉ង់គឺកាន់តែខិតជិតមកដល់ ហើយអាចកើតឡើងក្នុងរយៈពេលតែប៉ុន្មានម៉ោងទៀតប៉ុណ្ណោះ។ ចំណែកអ៊ីរ៉ង់ ក៏បានសម្រេចបិទជើងហោះហើរទាំងអស់ផងដែរ ដើម្បីត្រៀមឆ្លើយតបនឹងសង្រ្គាមដ៏ធំជាមួយអាមេរិក។
គួររំលឹកថា ក្នុងរយៈពេលប៉ុន្មានថ្ងៃថ្មីៗនេះ លោកប្រធានាធិបតី Donald Trump បានចេញការគំរាមកំហែងជាច្រើនប្រឆាំងនឹងសាធារណរដ្ឋឥស្លាមមួយនេះដែលបាន និងកំពុងធ្លាក់ក្នុងភាពចលាចលចាប់តាំងពីចុងខែ ធ្នូ មក។
ភាពចលាចលបានផ្ទុះឡើងចំពេលអតិផរណាកើនឡើង និងការធ្លាក់ចុះយ៉ាងខ្លាំងនៃប្រាក់រៀលអ៊ីរ៉ង់។ ទីក្រុងតេអេរ៉ង់ បានស្តីបន្ទោសចំពោះអំពើហឹង្សាតាមដងផ្លូវ ដោយចោទប្រកាន់ថាជាទង្វើរបស់អាមេរិក និងអ៊ីស្រាអែល ដែលបានរៀបចំ។
កាលពីថ្ងៃពុធម្សិលមិញ ទីភ្នាក់ងារសារព័ត៌មាន Reuters បានដកស្រង់សម្តីមន្ត្រីយោធាលោកខាងលិចដែលមិនបញ្ចេញឈ្មោះ ដោយនិយាយថា សញ្ញាទាំងអស់គឺថាការវាយប្រហាររបស់អាមេរិកជិតមកដល់ហើយ។
យោងតាមសារព័ត៌មានដែលបានដកស្រង់សម្តីមន្ត្រីអឺរ៉ុបពីរនាក់ដែលមិនបញ្ចេញឈ្មោះ បាននិយាយថា អន្តរាគមន៍យោធារបស់អាមេរិកអាចនឹងមកដល់ក្នុងរយៈពេល ២៤ ម៉ោង ទៀតនេះ។
ទីភ្នាក់ងារព័ត៌មាន Reuters បានដកស្រង់សម្តីមន្ត្រីអ៊ីស្រាអែលដែលមិនបញ្ចេញឈ្មោះដូចគ្នា ដែលលើកឡើងថា លោក Trump ហាក់ដូចជាបានសម្រេចចិត្តក្នុងគោលបំណងវាយប្រហារអ៊ីរ៉ង់រួចហើយ។
សហរដ្ឋអាមេរិក កំពុងជម្លៀសកម្លាំងយោធារបស់ខ្លួនមួយចំនួនចេញពីមូលដ្ឋាននៅមជ្ឈិមបូព៌ា ក្នុងករណីមានការវាយប្រហារសងសឹកពីអ៊ីរ៉ង់។
កាលពីដើមសប្តាហ៍នេះ លោក Trump បានអំពាវនាវដល់បាតុករអ៊ីរ៉ង់ឲ្យដណ្តើមយកការគ្រប់គ្រងស្ថាប័នរដ្ឋ បន្ទាប់ពីលោក ប្រកាសមុននេះថា ជំនួយកំពុងតែមកដល់ហើយ៕
ដោយ៖ ពេជ្រ
