អាជ្ញាធរ បានឱ្យដឹង កាលពីថ្ងៃព្រហស្បតិ៍ថា ចំនួនអ្នកស្លាប់នៅក្នុងខេត្តសុងក្លាប្រទេសថៃកើនឡើងដល់ ៥៥នាក់ បន្ទាប់ពីទឹកជំនន់ធ្ងន់ធ្ងរនៅតំបន់ភាគខាងត្បូង ដោយព្រមានថាចំនួននេះអាចនឹងកើនឡើងបន្ថែមទៀត។
ក្នុងអំឡុងពេលសន្និសីទសារព័ត៌មាន អ្នកនាំពាក្យរដ្ឋាភិបាល លោក Siripong Angkasakulkiat បាននិយាយថា ទិន្នន័យដែលទទួលបានពីមន្ទីរពេទ្យសុងក្លាណាហ្គារីន គិតត្រឹមថ្ងៃព្រហស្បតិ៍បង្ហាញថាមានអ្នកស្លាប់សរុបចំនួន ៥៥ នាក់នៅក្នុងខេត្តនេះ។
លោក បានបន្ថែមថា ចំនួននេះពិតជានឹងកើនឡើងខ្ពស់ជាងនេះទៅទៀត ដោយកត់សម្គាល់ថា នេះជាការវាយតម្លៃបឋម ដោយសារក្រុមជួយសង្គ្រោះមិនទាន់បានចូលទៅកាន់តំបន់ដាច់ស្រយាលទាំងអស់នៅឡើយ ហើយតួលេខអ្នកបាត់ខ្លួនពិតប្រាកដនៅមិនទាន់ធ្វើបច្ចុប្បន្នភាពនៅឡើយ ខណៈការជម្លៀសនៅតែបន្ត។
ទោះជាយ៉ាងណា អ្នកនាំពាក្យរូបនេះ បន្តថា កម្ពស់ទឹកត្រូវបានគេរំពឹងថានឹងស្រកទៅវិញ នៅថ្ងៃសុក្រនេះ ដោយបន្ថែមថា ការកែលម្អនេះនឹងជួយសម្រួលដល់ប្រតិបត្តិការជួយសង្គ្រោះ និងអាចឱ្យរដ្ឋាភិបាលចាប់ផ្តើមប្រតិបត្តិការសម្អាតភក់ទ្រង់ទ្រាយធំ៕
ដោយ៖ ពេជ្រ
