យោធាអ៊ីស្រាអែលបានឲ្យដឹងថា ស្ត្រីជនជាតិអ៊ីស្រាអែល ៣នាក់ ដែលចាប់ជាចំណាប់ខ្មាំងដោយក្រុមអ៊ីស្លាមហាម៉ាស ត្រូវបានដោះលែងកាលពីថ្ងៃអាទិត្យ ដែលជាផ្នែកមួយនៃកិច្ចព្រមព្រៀងបទឈប់បាញ់រវាងភាគីទាំងពីរ។
បទឈប់បាញ់រយៈពេលប្រាំមួយសប្តាហ៍បានចាប់ផ្តើមនៅតំបន់ហ្គាហ្សាស្ទ្រីបនៅម៉ោង ១១:១៥ នាទីព្រឹកថ្ងៃអាទិត្យ ម៉ោងក្នុងស្រុក បន្ទាប់ពីបានពន្យារពេលជិតបីម៉ោង។ ក្រុមហាម៉ាស់ត្រូវបានគេរំពឹងថានឹងដោះលែងចំណាប់ខ្មាំងចំនួន ៣៣ នាក់ក្នុងចំណោមចំណាប់ខ្មាំងប្រហែល ១០០ នាក់ដែលត្រូវបានចាប់ខ្លួននៅហ្គាហ្សា។
យោធាអ៊ីស្រាអែលបានប្រកាសកាលពីថ្ងៃអាទិត្យថា ចំណាប់ខ្មាំង ៣នាក់ដំបូងត្រូវបានប្រគល់ទៅឱ្យគណៈកម្មាធិការអន្តរជាតិនៃកាកបាទក្រហមក្រោមកិច្ចព្រមព្រៀង។ រដ្ឋាភិបាលអ៊ីស្រាអែលនិយាយថា ចំណាប់ខ្មាំងទាំង ៣នាក់ត្រូវបានបញ្ជូនទៅយោធាអ៊ីស្រាអែលនៅហ្គាហ្សា មុននឹងឆ្លងព្រំដែនចូលក្នុងប្រទេសអ៊ីស្រាអែល។
ទីភ្នាក់ងារព័ត៌មាន Reuters បានដកស្រង់សម្ដីមន្ត្រីអ៊ីស្រាអែលម្នាក់ដែលនិយាយថា ចំណាប់ខ្មាំងមានសុខភាពល្អ។ ប្រព័ន្ធផ្សព្វផ្សាយក្នុងស្រុកក៏បានរាយការណ៍ដែរថាក្រុមហាម៉ាស់នឹងដោះលែងចំណាប់ខ្មាំងជាច្រើននាក់ក្នុងមួយសប្តាហ៍ក្រោមកិច្ចព្រមព្រៀង។ ចំណែកអ៊ីស្រាអែលក៏គ្រោងនឹងដោះលែងអ្នកទោសប៉ាឡេស្ទីន និងទាញកម្លាំងយោធារបស់ខ្លួនពីតំបន់ដែលមានប្រជាជនច្រើនក្នុងអំឡុងពេលបទឈប់បាញ់។
ភាគីពាក់ព័ន្ធនឹងបន្តការចរចារបស់ពួកគេក្នុងអំឡុងពេលនៃបទឈប់បាញ់នេះ ដើម្បីស្វែងរកបទឈប់បាញ់ជាអចិន្ត្រៃយ៍ និងការកសាងឡើងវិញនៅហ្គាហ្សាក្នុងដំណាក់កាលទីពីរ និងទីបី។ អាជ្ញាធរសុខាភិបាលក្នុងតំបន់ហ្គាហ្សា បាននិយាយថា ការវាយលុកយោធារបស់អ៊ីស្រាអែល ដែលបានអូសបន្លាយជាង ១៥ ខែ បានសម្លាប់ប្រជាជនប៉ាឡេស្ទីនយ៉ាងហោចណាស់ ៤៦,៩១៣ នាក់។ ប៉ុន្តែឥឡូវនេះការផ្តោតអារម្មណ៍គឺទៅលើថាតើកិច្ចព្រមព្រៀងឈប់បាញ់នឹងត្រូវបានអនុវត្តដែរឬទេ៕
ដោយ៖ ពេជ្រ
