កាសែត Wall Street Journal បានរាយការណ៍កាលពីថ្ងៃសៅរ៍ដោយដកស្រង់ប្រភពមន្ត្រីថាប្រធានាធិបតីជាប់ឆ្នោតអាមេរិកលោក Donald Trump គ្រោងនឹងទៅបំពេញទស្សនកិច្ចនៅប្រទេសចិនក្នុងរយៈពេល ១០០ ថ្ងៃដំបូងនៃការកាន់តំណែងរបស់លោក ដើម្បីបង្កើនទំនាក់ទំនងជាមួយលោក Xi Jinping ខណៈដែលមានការរំពឹងទុកថា សង្រ្គាមពាណិជ្ជកម្មរវាងប្រទេសទាំង២នឹងកើតមានឡើងក្នុងអាណត្តិលោកត្រាំ។
ដំណើរទស្សនកិច្ចនេះមានគោលបំណងពង្រឹងទំនាក់ទំនងកាន់តែស៊ីជម្រៅជាមួយមេដឹកនាំចិននៅពេលប្រឈមមុខនឹងភាពតានតឹងនៃភូមិសាស្ត្រនយោបាយរវាងប្រទេសទាំងពីរដែលជំរុញដោយការប្រឈមមុខដាក់គ្នាជុំវិញកោះតៃវ៉ាន់ និងការសន្យារបស់លោក Trump ក្នុងការដំឡើងពន្ធលើការនាំចូលទំនិញរបស់ចិន។
ទោះជាយ៉ាងណាក៏ដោយ ខណៈពេលអ្នកដែលដឹងពីបញ្ហានេះបានប្រាប់កាសែតថា Trump បានបង្ហាញពីចំណាប់អារម្មណ៍ជាក់លាក់ក្នុងការទៅ ប៉ុន្តែមិនមានការសម្រេចចិត្តចុងក្រោយត្រូវបានធ្វើឡើងទេ។
កាលពីថ្ងៃសុក្រ លោក Trump និងលោក Xi បានជួបសន្ទនាតាមទូរស័ព្ទដើម្បីពិភាក្សាអំពីបញ្ហាជាច្រើន រួមទាំងពាណិជ្ជកម្ម តៃវ៉ាន់ និងស្ថានភាពជាមួយនឹងវេទិកាប្រព័ន្ធផ្សព្វផ្សាយសង្គម Tiktok ដែលគ្រប់គ្រងដោយចិន ដែលនឹងត្រូវបិទនៅក្នុងសហរដ្ឋអាមេរិក ខណការហាមឃាត់របស់សហព័ន្ធដែលជិតមកដល់។
ទោះជាយ៉ាងនេះក្តី វាមិនច្បាស់ទេថា តើប្រធានាធិបតីជាប់ឆ្នោតបានលើកឡើងពីគំនិតនៃដំណើរទស្សនកិច្ចទៅកាន់ប្រទេសចិនក្នុងអំឡុងពេលការហៅទូរស័ព្ទឬអត់។
តាមប្រភពព័ត៌មានបានឲ្យដឹងថា ក្រៅពីប្រទេសចិន លោក Trump ក៏បានបង្ហាញចំណាប់អារម្មណ៍ចំពោះដំណើរទៅកាន់ប្រទេសឥណ្ឌាផងដែរ។ ទោះបីជាយ៉ាងណាក៏ដោយ គេនិយាយថា ការយកចិត្តទុកដាក់ភ្លាមៗរបស់លោក Trump គឺបញ្ហាក្នុងស្រុក រួមមានវិបត្តិព្រំដែន និងភ្លើងឆេះព្រៃនៅរដ្ឋកាលីហ្វ័រញ៉ាជាដើម។
គួររំលឹកថា ក្នុងអំឡុងពេលអាណត្តិទី១របស់លោក Trump បានធ្វើដំណើរទៅកាន់ទីក្រុងប៉េកាំងនៅចុងឆ្នាំ ២០១៧ ច្រើនជាង ៩ ខែបន្ទាប់ពីការចូលកាន់តំណែង។ រយៈពេលបួនឆ្នាំនៃការគ្រប់គ្រងរបស់លោក Trump ត្រូវបានរំខានដោយការប្រឈមមុខតានតឹងជាមួយប្រទេសចិន ដោយប្រធានាធិបតីជាប់ឆ្នោតបានដាក់ពន្ធលើទំនិញចិនរាប់ពាន់លានដុល្លារ។ រដ្ឋបាលរបស់គាត់ក៏បានដាក់ស្លាកប្រទេសចិនថាជា “អ្នករៀបចំរូបិយប័ណ្ណ” និងបានដាក់ការរឹតបន្តឹងយ៉ាងតឹងរ៉ឹងលើក្រុមហ៊ុនបច្ចេកវិទ្យាយក្សរបស់ចិនដូចជា Huawei និង ZTE ដោយលើកឡើងពីហានិភ័យសន្តិសុខជាតិ។
ក្នុងអំឡុងពេលឃោសនាបោះឆ្នោត លោក Trump បានស្នើដំឡើងពន្ធ ៦០% លើការនាំចូលរបស់ចិន។ ឆ្លើយតបទៅនឹងការកើនឡើងដ៏មានសក្តានុពល អនុរដ្ឋមន្ត្រីក្រសួងពាណិជ្ជកម្មចិន លោក Wang Shouwen បានព្រមានថា ការរឹតបន្តឹងអាចត្រលប់មកវិញ ដោយបង្ខំឱ្យអ្នកប្រើប្រាស់អាមេរិកបង់ថ្លៃខ្ពស់៕
ដោយ៖ ពេជ្រ
