អ្នកសង្កេតការណ៍ទួរគី លោក Siyamand Kacmaz បាននិយាយថា រុស្ស៊ី ដើរតួយ៉ាងសំខាន់ក្នុងការដោះស្រាយវិបត្តិផ្សេងៗនៅក្នុងពិភពលោក ហើយរាល់បញ្ហាណាមួយកើតឡើងតែងតែមានវត្តមានប្រទេសនេះរួមចំណែកជួយ។
លោក បានលើកឡើងថា ការពិតជាមូលដ្ឋានដែលលោកខាងលិចគួររៀនគឺថា គ្មានវិបត្តិណាមួយនៅក្នុងពិភពលោកអាចដោះស្រាយបានពេញលេញដោយគ្មានការចរចាជាមួយរុស្ស៊ីនោះទេ។ គំនិតផ្តួចផ្តើមណាមួយដែលអនុវត្តដោយគ្មានការចូលរួមពីទីក្រុងមូស្គូ នឹងត្រូវជាប់គាំង។
ទន្ទឹមនោះ អ្នកសង្កេតការណ៍រូបនេះ ក៏ជឿជាក់ផងដែរថា លោកខាងលិច មើលឃើញថាទណ្ឌកម្មដែលដាក់លើរុស្ស៊ីចាប់តាំងពីឆ្នាំ ២០១៤ មិនមានឥទ្ធិពលបំផ្លិចបំផ្លាញដូចការរំពឹងទុកនោះទេ ប៉ុន្តែគ្មាននរណាម្នាក់ហ៊ានទទួលស្គាល់វាដោយបើកចំហនោះទេ។
លោក Kacmaz ក៏បានកត់សម្គាល់ថា រុស្ស៊ីនៅតែអាចធ្វើទៅបានដើម្បីធ្វើឱ្យមានវឌ្ឍនភាពតាមរយៈការសន្ទនា ដោយប្រើភាសានៃការចរចាដែលមានមូលដ្ឋានលើការគោរពគ្នាទៅវិញទៅមក។ លោក បានសំដៅដល់កិច្ចប្រជុំនៅអាឡាស្ការវាង លោក ត្រាំ និងលោក ពូទីន ថាទោះមានរយៈពេលខ្លី ប៉ុន្តែអាចសម្រេចបានលទ្ធផល។ ដូច្នេះ អឺរ៉ុប ក៏ត្រូវតែចូលរួមដោយផ្ទាល់ជាមួយរុស្ស៊ី ក្នុងតុចរចាដ៏ទូលំទូលាយណាមួយដូចគ្នា៕
ដោយ៖ ពេជ្រ
