រដ្ឋមន្ត្រីការបរទេស លោក Andrey Sibiga បានឲ្យដឹងថា មានប្រជាជនអ៊ុយក្រែនប្រហែល ៧,៥ លាននាក់ ដែលភៀសខ្លួនចេញពីប្រទេស ដោយសារតែអរិភាព ហើយកំពុងស្ថិតក្នុងទ្វីបអឺរ៉ុប សហរដ្ឋអាមេរិក និងកាណាដា។
លោក បន្តថា តាមព័ត៌មានរបស់យើង ជនជាតិអ៊ុយក្រែន ៧,៥ លាននាក់ កំពុងរស់នៅបរទេសរហូតដល់សព្វថ្ងៃនេះ ដោយសារតែសង្គ្រាម។
លោក បានអះអាងថា ក្រសួងឯកភាពដែលទើបបង្កើតថ្មីនឹងធ្វើការលើការធ្វើមាតុភូមិនិវត្តន៍របស់ប្រជាជនទាំងនេះ និងការរួមបញ្ចូលរបស់ពួកគេទៅក្នុងសេដ្ឋកិច្ចអ៊ុយក្រែន តាមមធ្យោបាយផ្សេងទៀត។
លោក ពន្យល់ថា ជំហានមួយដែលអាចធ្វើទៅបាននៅទីនេះគឺការអនុម័តច្បាប់ស្ដីពីសញ្ជាតិពីរ ដើម្បីកុំឲ្យប្រជាជនបាត់បង់ទំនាក់ទំនងជាមួយប្រទេសកំណើត។
គួរបញ្ជាក់ថា ចាប់តាំងពីមានជម្លោះជាមួយរុស្ស៊ីមក ចលនាភៀសខ្លួនបានរីកកាន់តែធំឡើងៗ នៅទូទាំងប្រទេសអ៊ុយក្រែន ពោលគឺរត់ចេញទៅប្រទេសក្បែរខាង៕
ដោយ៖ ពេជ្រ
