គ្រោះរញ្ជួយដីកម្រិត ៦.០ រ៉ិចទ័រ ដែលវាយប្រហារនៅភាគខាងកើតប្រទេសអាហ្វហ្គានីស្ថានជិតព្រំដែនប៉ាគីស្ថាន បានសម្លាប់មនុស្សឡើងដល់ជាង ១,១២៤ នាក់ និងរាប់ពាន់នាក់ទៀតរងរបួស។
អាជ្ញាធរ បានចំណាយពេលពេញមួយយប់ ក្នុងកិច្ចខិតខំប្រឹងប្រែងជួយសង្គ្រោះ ដែលកំពុងនៅតែបន្ត។
សាកសពភាគច្រើន ត្រូវបានរកឃើញនៅក្នុងខេត្ត Kunar ដែលនៅជិតចំណុចកណ្តាលនៃគ្រោះរញ្ជួយបំផុត។ មន្ត្រី ព្រមានថា ចំនួនអ្នកស្លាប់អាចនឹងកើនឡើងច្រើនជាងនេះទៀត ខណៈភូមិទាំងមូលនៃដែលរងការវាយប្រហារត្រូវបានបំផ្លាញទាំងស្រុង។
ទន្ទឹមនោះ សមាគមន៍អន្តរជាតិ ក៏បានសន្យាផ្តល់ជំនួយ និងខិតខំជួយក្នុងកិច្ចការស្វែងរកអ្នកស្លាប់បន្ថែម ខណៈដែលភូមិមួយចំនួននៅតែមិនអាចចូលទៅដល់។
គ្រោះមហន្តរាយ កើតឡើងនៅពេលដែលប្រទេសអាហ្វហ្គានីស្ថានទើបតែជួបគ្រោះរាំងស្ងួតធ្ងន់ធ្ងរ។
គួរបញ្ជាក់ថា ការរញ្ជួយដីនេះ បានវាយប្រហារនៅម៉ោង ២៣ និង ៤៧ រំលងអធ្រាត្រ (ម៉ោងក្នុងស្រុក) កាលពីថ្ងៃអាទិត្យ ចម្ងាយប្រហែល ២៧គីឡូម៉ែត្រ (១៧ ម៉ាយ) ភាគខាងកើតនៃទីក្រុង Jalalabad ដែលជាទីក្រុងធំជាងគេទី ៥ របស់ប្រទេស៕
ដោយ៖ ពេជ្រ
