នាង Georgina Rodriguez មានមោទនភាពបានបង្ហាញពីការភ្ជាប់ពាក្យរបស់នាងជាមួយកំពូលតារាព័រទុយហ្គាល់ Cristiano Ronaldo ជាមួយនឹងចិញ្ចៀនពេជ្រដ៏ធំកាលពីថ្ងៃអង្គារដោយសរសេរការបញ្ចប់ដ៏រីករាយចំពោះទំនាក់ទំនងរយៈពេល៩ឆ្នាំរបស់ពួកគេ។
នាង Georgina បានចែករំលែករូបថតមួយសន្លឹកពាក់ចិញ្ចៀនពេជ្រដ៏ធំ ដែលទទួលបានពីខ្សែប្រយុទ្ធសញ្ជាតិព័រទុយហ្កាល់រូបនេះជាមួយថា «ពិតណាស់ខ្ញុំយល់ព្រម! នៅក្នុងពេលនេះ និងនៅពេញមួយជីវិតរបស់ខ្ញុំ»។
ការបង្ហោះរូបនេះរបស់នាង បាន ផ្ទុះការចែកចាយយ៉ាងខ្លាំង ដោយមានមនុស្សចាប់អារម្មណ៍ចុចតាមដានប្រមាណ ១,៥លានដង ក្នុងរយៈពេល ៤០នាទី តែប៉ុណ្ណោះ។ អ្នកគាំទ្របានចូលរួមបញ្ចេញមតិដោយសារអបអរសាទរ និងជូនពរគូស្នេហ៍មួយគូនេះ។
ចិញ្ចៀននេះត្រូវបានប៉ាន់ប្រមាណដោយអ្នកជំនាញគ្រឿងអលង្ការមានតម្លៃជាងមួយលានដុល្លារ ហើយទំនងជាលើសពី ១០-១៥ ការ៉ាត់ ។នេះបើយោងតាមកាសែត Marca ។
សូមជម្រាបថា Ronaldo និង នាង Georgina បានជួបគ្នាដំបូងនៅហាង Gucci ក្នុងទីក្រុង Madrid ដែលនាង Georgina បានធ្វើការជាអ្នកលក់នៅហាងនោះ។ បន្ទាប់មកទៀត Ronaldo បន្តទៅហាងសម្លៀកបំពាក់នោះ និងបានណាត់ជួបបុគ្គលិកជនជាតិអាសហ្សង់ទីន វ័យ៣១ឆ្នាំរូបនេះ ដើម្បីផ្តើមជជែកគ្នាលើកដំបូង។
ទំនាក់ទំនងស្នេហារបស់អ្នកទាំងពីរ ចាប់ផ្តើមបង្ហាញជាសាធារណៈ នៅចុងឆ្នាំ ២០១៦ ពេលដើរលេងនៅសួនកម្សាន្ត Disneyland ទីក្រុងប៉ារីស។ តាំងពីពេលនោះមក នាង Georgina តែងតែត្រូវបានគេឃើញរស់នៅជិត កីឡាករវ័យ ៤០ឆ្នាំ ជាប់ជានិច្ច ហើយតែងតែទៅគាំទ្ររាល់ការប្រកួត ក៏ដូចជាការរស់នៅជីវិតប្រចាំថ្ងៃជាមួយគ្នា។
នាង Georgina មានកូនពីរនាក់ជាមួយ Ronaldo៖ Alana Martina កើតក្នុងឆ្នាំ ២០១៧ និងកូនភ្លោះរួមទាំង Bella Esmeralda កើតនៅឆ្នាំ ២០២២។ ជាអកុសល ប្អូនប្រុសភ្លោះរបស់ Bella បានទទួលមរណភាពភ្លាមៗបន្ទាប់ពីកំណើត៕
