Lamine Yamal បានចុះហត្ថលេខាលើកិច្ចសន្យាថ្មីជាមួយ Barcelona រយៈពេល៦ឆ្នាំបន្ថែមទៀត បន្ទាប់បានជួយក្លឹបកាតាឡានឈ្នះពានរង្វាន់លីគកំពូលអេស្ប៉ាញរដូវកាលនេះ។
កិច្ចព្រមព្រៀងដែលមានស្រាប់របស់ខ្សែបម្រើស្លាបអេស្ប៉ាញវ័យ ១៧ ឆ្នាំរូបនេះ នឹងត្រូវផុតកំណត់នៅចុងរដូវកាល ២០២៥-២៦ ប៉ុន្តែកិច្ចសន្យាថ្មីនេះនឹងរក្សា Yamal នៅជាមួយ Barca រហូតដល់ឆ្នាំ ២០៣១។ កិច្ចសន្យាថ្មីនេះកីឡាករ Lamine Yamal នឹងទទួលបានប្រាក់ខែ១៥លានក្នុងមួយឆ្នាំ ជាមួយប្រាក់លើកទឹកចិត្ត៥លានទៀតបើគាត់អាចឈ្នះ Ballon d’Or ។
Yamal បានបង្ហាញខ្លួនជាលើកដំបូងនៅ Barca ត្រឹមវ័យ ១៥ ឆ្នាំក្នុងឆ្នាំ ២០២៣ ស៊ុតបញ្ចូលទីបាន ១៨ គ្រាប់ និង assists ២៥ ដងក្នុងការបង្ហាញខ្លួន ៥៥ លើក ខណៈដែល Barca បានឈ្នះ La Liga, Copa del Rey និង Spanish Super Cup ក្នុងរដូវកាលដំបូងរបស់លោក Hansi Flick ជាអ្នកគ្រប់គ្រង។
Barca បាននិយាយថា Yamal បានចុះហត្ថលេខាលើកិច្ចសន្យាថ្មីកាលពីថ្ងៃអង្គារនៅក្នុងវត្តមានរបស់ប្រធានក្លឹបលោក Joan Laporta និងនាយកកីឡាលោក Deco ។ ក្លឹបបាននិយាយថា “ការបន្តកុងថ្មីរបស់ Yamal គឺជាការបង្ហាញពីភាពរឹងមាំនៃគម្រោងរបស់ Barca ។
Yamal ស៊ុតបញ្ចូលទីបាន ២៥ គ្រាប់ក្នុងការបង្ហាញខ្លួន១១៥ ប្រកួតសម្រាប់ក្លឹប ហើយក្លាយជាអ្នកស៊ុតបញ្ចូលទីក្មេងបំផុតក្នុងប្រវត្តិសាស្ត្រ La Liga, Copa del Rey និង Spanish Super Cup ។ កីឡាកររូបនេះនឹងឈានចូលដល់វ័យ១៨ ឆ្នាំក្នុងខែកក្កដាក៏ជាកីឡាករក្មេងបំផុតដែលឈានដល់ការបង្ហាញខ្លួនបាន ១០០ លើកសម្រាប់ Barca ផងដែរ៕
