ប្រធានាធិបតីរុស្ស៊ី វ្ល៉ាឌីមៀ ពូទីន បាននិយាយថា យោធារុស្ស៊ីមានកាំជ្រួចរយៈចម្ងាយឆ្ងាយ និងមានកម្លាំងខ្លាំងជាងឧបករណ៍ដែលលោកខាងលិចផ្គត់ផ្គង់ដល់អ៊ុយក្រែន។ លោកថា អាវុធទំនើបខាងលើនេះអាចនឹងត្រូវប្រើដើម្បីបាញ់ទៅទីក្រុងគៀវ។
លោកពូទីនបានថ្លែងបែបនេះក្នុងអំឡុងពេលកិច្ចប្រជុំកំពូលរបស់អង្គការសន្ធិសញ្ញាសន្តិសុខសមូហភាព (CSTO) នៅរដ្ឋធានីកាហ្សាក់ស្ថាន។ លោកថា ប្រព័ន្ធកាំជ្រួចមីស៊ីលរយៈចម្ងាយខ្លី Iskander របស់រុស្ស៊ីមានសមត្ថភាពប្រហាក់ប្រហែលនឹងប្រព័ន្ធមីស៊ីលATACMS ប្រភេទកែសម្រួលថ្មីដែលផលិតដោយសហរដ្ឋអាមេរិក ប៉ុន្តែវាមានរយៈចម្ងាយឆ្ងាយជាងនេះ។
លោកបានបន្ថែមថា ប្រព័ន្ធ PrSM (Precision Strike Missile) ថ្មីរបស់អាមេរិក គឺមិនប្រសើរជាងអាវុធមីស៊ីលសមភាគីរុស្ស៊ីនោះទេទាក់ទងនឹងលក្ខណៈនៃប្រសិទ្ធភាព។
កាលពីដើមខែនេះ សហរដ្ឋអាមេរិក ចក្រភពអង់គ្លេស និងបារាំងបានអនុញ្ញាតឱ្យអ៊ុយក្រែនប្រើប្រាស់អាវុធរយៈចម្ងាយឆ្ងាយដែលពួកគេបានផ្គត់ផ្គង់មុននេះ ដើម្បីធ្វើការវាយប្រហារលើទឹកដីរុស្ស៊ីដែលទទួលស្គាល់ជាអន្តរជាតិ ខណដែលការវាយប្រហារបែបនេះជាច្រើនលើកបានកើតឡើងរួចហើយ។ កងកម្លាំងរបស់ទីក្រុង Kiev បច្ចុប្បន្នត្រូវបានបំពាក់ដោយមីស៊ីទំនើប ATACMS របស់អាមេរិក ក៏ដូចជាកាំជ្រួច Storm Shadow របស់អង់គ្លេស និងកាំជ្រួច SCALP របស់បារាំង។
លោក ពូ ទីន ថ្លែងថា ជាការពិតណាស់ យើងដឹងថាតើប្រព័ន្ធអាវុធដែលពាក់ព័ន្ធមានចំនួនប៉ុន្មានដែលគូប្រជែងរបស់យើងមាន។ កន្លែងដែលពួកគេមាននោះ តើមានទីតាំងនៅណា តើសព្វាវុធប៉ុន្មានត្រូវបានបញ្ជូនទៅអ៊ុយក្រែន និងចំនួនប៉ុន្មានត្រូវបានគ្រោងនឹងប្រគល់បន្ថែមទៀត។
ប្រធានាធិបតីរុស្ស៊ីបានបញ្ជាក់ឲ្យដឹងថា ទោះបីជាពួកគេខិតខំបញ្ជូនអាវុធទំនើបៗ និងច្រើនកម្រិតណាក៏ដោយឲ្យអ៊ុយក្រែន ក៏វាមិនអាចកែប្រែស្ថានការណ៍នៅសមរភូមិនោះដែរ ខណដែលយើងនៅតែមានប្រៀបលើសត្រូវ។
លោកក៏បានចង្អុលបង្ហាញថា ទីក្រុងម៉ូស្គូមានប្រៀបលើសអ្នកគាំទ្រលោកខាងលិចរបស់អ៊ុយក្រែនយ៉ាងច្រើនណាស់ក្នុងលក្ខខណ្ឌនៃការផលិតអាវុធរយៈចម្ងាយឆ្ងាយ។លោកថា សម្រាប់ទិន្នផលនៃប្រព័ន្ធមីស៊ីលដែលពាក់ព័ន្ធនៅក្នុងប្រទេសរុស្ស៊ីវាខ្ពស់ជាងដប់ដងនិងច្រើនជាងការផលិតរួមគ្នានៅក្នុងប្រទេសណាតូទាំងអស់ ហើយនៅឆ្នាំក្រោយនេះវានឹងកើនឡើង ២៥-៣០% ឯណោះ។ លោកក៏បានកត់សម្គាល់ថា ឃ្លាំងអាវុធរបស់រុស្ស៊ី រួមមានកាំជ្រួចបើកបរ Kalibr ក៏ដូចជាមីស៊ីលល្បឿនលឿនជាងសំឡេង Kinzhal និង Zircon ហើយបើនិយាយពីលក្ខណៈនៃឥទ្ធិពលរបស់វាគឺមិនមានអាវុធណាមកប្រៀបវាបានទេនៅលើពិភពលោក។ លោកបានបន្តថា ផលិតកម្មយោធាសំខាន់ៗទាំងនោះ ឥឡូវនេះកំពុងត្រូវបានពង្រីកបន្ថែមទៀត។
លោកពូទីនបានសន្យាថានៅក្នុងប៉ុន្មានឆ្នាំខាងមុខនេះ ប្រព័ន្ធអាវុធដែលមានសំឡេងលឿនទំនើបថ្មីនឹងត្រូវបានបញ្ចូលទៅក្នុង “ម៉ឺនុយ” សម្រាប់ឧស្សាហកម្មយោឌារបស់ប្រទេសរុស្ស៊ីថែមទៀត៕
ដោយ៖ ពេជ្រ
