សាឡាងមួយគ្រឿងដែលផ្ទុកមនុស្សជាង ៣៥០ នាក់ បានជួបឧបទ្ទវហេតុលិច នៅព្រឹកថ្ងៃច័ន្ទនេះ នៅភាគខាងត្បូងប្រទេសហ្វីលីពីន ដោយបណ្តាលឱ្យមនុស្សយ៉ាងហោចណាស់ ១៥ នាក់ស្លាប់ និង ២៨ នាក់បាត់ខ្លួន។
ឆ្មាំសមុទ្រហ្វីលីពីន បានឱ្យដឹង នៅក្នុងសេចក្តីថ្លែងការណ៍ថា សាឡាង MV Trisha Kerstin 3 បានជូនដំណឹងជាសញ្ញាអាសន្ននៅម៉ោងប្រហែល ១ និង ៥០នាទីព្រឹក ជាងបួនម៉ោងបន្ទាប់ពីចាកចេញពីកំពង់ផែ Zamboanga នៅភាគនិរតីនៃកោះ Mindanao។
លោក Romel Dua មេបញ្ជាការកងឆ្មាំសមុទ្រ បានប្រាប់ថា យ៉ាងហោចណាស់មនុស្ស ៣១៦ នាក់ ត្រូវបានជួយសង្គ្រោះរហូតមកដល់ពេលនេះ ដោយមានអ្នកស្លាប់ចំនួន ១៥ នាក់ និង ២៨ នាក់ទៀតនៅមិនទាន់រកឃើញនៅឡើយ។
កងឆ្មាំសមុទ្រ កងទ័ពជើងទឹក និងកងទ័ពអាកាស កំពុងធ្វើការរួមគ្នា លើប្រតិបត្តិការជួយសង្គ្រោះនេះ។
សាឡាងបានលិចនៅចម្ងាយប្រហែល ៥ គីឡូម៉ែត្រភាគខាងកើតនៃកោះ Baluk-Baluk ដែលជាផ្នែកមួយនៃខ្សែកោះខេត្ត Basilan នៅក្រៅឧបទ្វីប Zamboanga។
អ្នកឆ្លើយតបគ្រាអាសន្ននៃកោះ Basilan លោក Ronalyn Perez បានបញ្ជាក់ថា ក្រុមអ្នកជួយសង្គ្រោះ កំពុងព្យាយាមបន្ថែមទៀត។
យោងតាមវីដេអូដែលចេញផ្សាយដោយឆ្មាំសមុទ្រហ្វីលីពីន បង្ហាញពីអ្នករស់រានមានជីវិតកំពុងត្រូវបានលើកឡើងពីទឹក និងទទួលការសង្គ្រោះបឋម។
ទោះជាយ៉ាងណា មូលហេតុដែលបណ្ដាលឱ្យលិចសាឡាងនេះ នៅមិនទាន់ដឹងនៅឡើយនោះទេ៕
ដោយ៖ ពេជ្រ
