ក្លិបព្រះខ័នរាជស្វាយរៀង បានបញ្ចប់កំណត់ត្រាមិនដែលចាញ់របស់ក្រុមម្ចាស់ផ្ទះភ្នំពេញក្រោន នៅក្នុងលីគកំពូលកម្ពុជាហើយ សម្រាប់់ការប្រកួតសប្តាហ៍ទី១៦ បន្ទាប់យកឈ្នះដោយលទ្ធផល ៣-២ កាលពីយប់មិញនៅកីឡដ្ឋានភ្នំពេញក្រោន។
យ៉ាងណាមិញក្រោយចប់ការប្រកួតលោក Matthew McConkey គ្រូបង្វឹករបស់ក្រុម ព្រះខ័នរាជស្វាយរៀង បានបង្ហាញចំណាប់អារម្មណ៍ដូច្នេះថា «ការចាប់ផ្តើមគឺមិនល្អទេ ប៉ុន្តែការបញ្ចប់គឺអស្ចារ្យ ហើយខ្ញុំរីករាយដែលពួកគេអាចរីករាយជាមួយយើង។ សរុបមក វាជាល្ងាចដ៏ល្អមួយ សម្រាប់ការលេងរបស់យើង។ ស្មៅទីនេះ គឺល្អឥតខ្ចោះសម្រាប់ការលេងបាល់ទាត់»។
លោកថា «យើងបង្កើតឱកាសជាច្រើន ជាពិសេសនៅវគ្គទី ២។ យើងមានឱកាសល្អៗជាច្រើន ដែលអាចរកបានគ្រាប់បាល់ ប៉ុន្តែយើងមិនអាចធ្វើបាន…។ ទោះបីជាយ៉ាងណា អ្នករាល់គ្នាបានឃើញនៅក្នុងការប្រកួតហើយ គឺយើងពិតជាបង្ហាញទម្រង់លេងបានល្អ»។
គួរឱ្យដឹង ថា ព្រះខ័នរាជស្វាយរៀង បច្ចុប្បន្នកំពុងបន្តឈរកំពូលតារាងក្នុងលីគកំពូល កម្ពុជា ដោយមាន ៣៩ ពិន្ទុ និងលើសក្រុមលេខ ២ ភ្នំពេញក្រោន ៥ ពិន្ទុ ដែលមាន ៣៤ ពិន្ទុក្នុងដៃ ប៉ុន្តែ ភ្នំពេញក្រោន នៅសល់ ១ ប្រកួតទៀតក្នុងដៃ៕
