ឆ្មាំសមុទ្រហ្វីលីពីន រាយការណ៍ពីការដាក់ពង្រាយយន្តហោះមួយគ្រឿង កាលពីថ្ងៃអង្គារ ដើម្បីតាមដាននាវាស៊ើបការណ៍ចិនមួយគ្រឿង ដែលត្រូវបានប្រទះឃើញចម្ងាយប្រហែល ១៩ ម៉ាយសមុទ្រ (ប្រហែល ៣៥ គីឡូម៉ែត្រ) ពីឆ្នេរសមុទ្រនៃខេត្ត Cagayan ភាគខាងជើង។
យោងតាមការបញ្ជាក់របស់ឆ្មាំសមុទ្រហ្វីលីពីន (PCG) បានឱ្យដឹងថា យន្តហោះហ្វីលីពីន បានតាមដាន និងព្យាយាមធ្វើយ៉ាងណាទាក់ទងទៅកាន់នាវានោះ ដើម្បីបញ្ជាក់ថាតើ នាវានោះចូលស៊ើបការណ៍ក្នុងដែនសមុទ្រដោយមានការអនុញ្ញាត ឬមិនមានការយល់ព្រមពីទីក្រុងម៉ានីល ដែលនេះរំលោភលើច្បាប់ហ្វីលីពីន និងអន្តរជាតិ ប៉ុន្តែមិនបានទទួលការឆ្លើយតបទេ។
នាវាស៊ើបការណ៍មុជទឹកជ្រៅប្រវែង ៨៧,២៥ ម៉ែត្រ ដែលបានចាកចេញពីខេត្តហៃណានរបស់ប្រទេសចិន កាលពីដើមខែនេះ ហើយចូលទៅក្នុងផ្នែកខាងលិចនៃតំបន់សេដ្ឋកិច្ចផ្តាច់មុខរបស់ហ្វីលីពីន បន្ទាប់មកត្រូវបានត្រួតពិនិត្យឆ្ពោះទៅទិសខាងកើតប្រហែល ៥៥,៨ ម៉ាយល៍សមុទ្រ ពីកោះសាន់តាអាណា ខេត្តកាហ្គាយ៉ាន។ នេះបើយោងតាម PCG។
ខេត្តកាហ្គាយ៉ាន ដែលជាខេត្តភាគខាងជើងបំផុតនៃកោះលូហ្សុន ជិតកោះតៃវ៉ាន់ គឺជាទីតាំងមូលដ្ឋានយោធាមួយក្នុងចំណោមមូលដ្ឋានយោធាចំនួនប្រាំបួន ដែលអាចចូលទៅដល់កងកម្លាំងអាមេរិក ក្រោមកិច្ចព្រមព្រៀងសហប្រតិបត្តិការការពារជាតិប្រសើរឡើង (EDCA)។
កាលពីថ្ងៃអង្គារ ប្រទេសចិន បានរៀបចំសមយុទ្ធសង្គ្រាមជុំវិញកោះតៃវ៉ាន់ ដោយបាញ់រ៉ុក្កែតចូលទៅក្នុងដែនទឹកជុំវិញ និងធ្វើត្រាប់តាមការវាយប្រហារ និងការបិទផ្លូវក្នុងសមយុទ្ធដែលមានឈ្មោះថា “បេសកកម្មយុត្តិធម៌ ២០២៥” ដែលចាប់ផ្តើមប៉ុន្មានថ្ងៃ បន្ទាប់ពីទីក្រុងវ៉ាស៊ីនតោន ប្រកាសលក់កញ្ចប់អាវុធចំនួន ១១,១ ពាន់លានដុល្លារអាមេរិក សម្រាប់ទីក្រុងតៃប៉ិ។
PCG បញ្ជាក់ថា នាវាស៊ើបការណ៍ចិននោះ ត្រូវបានប្រទះឃើញតាមរយៈប្រព័ន្ធរកឃើញនាវាងងឹតដែលមានមូលដ្ឋានលើផ្កាយរណបរបស់ប្រទេសកាណាដា។
ស្ថានទូតចិនប្រចាំទីក្រុងម៉ានីល មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ៕
ដោយ៖ ពេជ្រ
