តៃវ៉ាន់ នៅតែប្រុងប្រៀបខ្ពស់ដដែល នៅថ្ងៃពុធនេះ បន្ទាប់ពីប្រទេសចិន បានធ្វើសមយុទ្ធយោធាដ៏ធំនៅជុំវិញកោះនេះ កាលពីថ្ងៃមុន ដោយរក្សាមជ្ឈមណ្ឌលឆ្លើយតបបន្ទាន់តាមសមុទ្ររបស់ខ្លួនឱ្យដំណើរការ។ នេះបើយោងតាមប្រធានឆ្មាំឆ្នេរសមុទ្ររបស់កោះ។
សមយុទ្ធដែលមានឈ្មោះថា “បេសកកម្មយុត្តិធម៌ ២០២៥” ប្រទេសចិន បានបាញ់រ៉ុក្កែតរាប់សិបគ្រាប់ឆ្ពោះទៅកាន់តៃវ៉ាន់ ដាក់ពង្រាយនាវាចម្បាំង និងយន្តហោះមួយចំនួនធំនៅជិតកោះនេះ ដែលជាការបង្ហាញកម្លាំងនាំឱ្យមានការព្រួយបារម្ភពីសម្ព័ន្ធមិត្តលោកខាងលិច រួមទាំងគណៈកម្មការអឺរ៉ុប និងចក្រភពអង់គ្លេស។
ទីក្រុងតៃប៉ិ បានថ្កោលទោសសមយុទ្ធនេះថាជាការគំរាមកំហែងដល់សន្តិសុខក្នុងតំបន់ និងជាការញុះញង់ដោយចំហ។
យោងតាមលោកស្រី Kuan Bi-ling ប្រធានក្រុមប្រឹក្សាកិច្ចការសមុទ្ររបស់តៃវ៉ាន់ បានឱ្យដឹងថា នាវាចិន កំពុងធ្វើដំណើរចេញពីតៃវ៉ាន់ហើយ ប៉ុន្តែទីក្រុងប៉េកាំង មិនទាន់បានប្រកាសជាផ្លូវការអំពីការបញ្ចប់សមយុទ្ធនេះនៅឡើយទេ។
លោកស្រី បានបន្ថែមថា ស្ថានភាពដែនសមុទ្រ បានស្ងប់ស្ងាត់ទៅវិញ ដោយនាវា និងកប៉ាល់តូចៗ ដកចេញជាបណ្តើរៗហើយ។ ដោយសារចិន មិនទាន់បានប្រកាសពីការបញ្ចប់សមយុទ្ធយោធា មជ្ឈមណ្ឌលឆ្លើយតបបន្ទាន់នៅតែប្រុងជើងការខ្ពស់។
មន្ត្រីឆ្មាំសមុទ្រតៃវ៉ាន់ម្នាក់ បានប្រាប់ឱ្យដឹងថា នាវាឆ្មាំសមុទ្រចិនទាំង ១១ គ្រឿង បានចាកចេញពីដែនទឹកក្បែរតៃវ៉ាន់។ មន្ត្រីសន្តិសុខតៃវ៉ាន់ម្នាក់បាននិយាយថា មជ្ឈមណ្ឌលឆ្លើយតបបន្ទាន់សម្រាប់យោធា និងឆ្មាំសមុទ្រនៅតែសកម្ម និងតាមដានយ៉ាងយកចិត្តទុកដាក់៕
ដោយ៖ ពេជ្រ
