ប្រទេសចិន បានរិះគន់កិច្ចព្រមព្រៀងអាវុធចុងក្រោយបំផុតរបស់សហរដ្ឋអាមេរិកជាមួយតៃវ៉ាន់ កាលពីថ្ងៃព្រហស្បតិ៍ថា សកម្មភាពនេះកំពុង «បង្កើនល្បឿន» ការគំរាមកំហែងនៃសង្គ្រាមនៅក្នុងច្រកសមុទ្រតៃវ៉ាន់។
កាលពីសប្តាហ៍មុន សហរដ្ឋអាមេរិក បានប្រកាសលក់អាវុធចំនួន ១១.១ ពាន់លានដុល្លារអាមេរិកទៅឱ្យតៃវ៉ាន់ ដែលជាកញ្ចប់អាវុធដ៏ធំបំផុតរបស់សហរដ្ឋអាមេរិក សម្រាប់កោះនេះ។
ទន្ទឹមនោះ លោក Zhang Xiaogang អ្នកនាំពាក្យក្រសួងការពារជាតិចិន បាននិយាយថា ភាគីសហរដ្ឋអាមេរិក ក្បត់ការប្តេជ្ញាចិត្តរបស់ខ្លួន ដោយបន្តបង្កើនការលក់អាវុធទៅឱ្យតៃវ៉ាន់ ដែលជំរុញឱ្យមានភាពក្រអឺតក្រទមបន្ថែមទៀត និងបង្កើនល្បឿនការគំរាមកំហែងនៃសង្គ្រាមនៅក្នុងច្រកសមុទ្រតៃវ៉ាន់។
លោក Zhang បាននិយាយ នៅក្នុងសន្និសីទសារព័ត៌មានធម្មតាមួយកាលពីថ្ងៃព្រហស្បតិ៍ថា សហរដ្ឋអាមេរិកគួរតែបញ្ឈប់ «ការញុះញង់» ទាំងអស់ និងកែតម្រូវ «សកម្មភាពខុស» របស់ខ្លួនជាមួយតៃវ៉ាន់។
លោក បន្តថា សេចក្តីព្រាងច្បាប់អវិជ្ជមានរបស់សហរដ្ឋអាមេរិកទាក់ទងនឹងតៃវ៉ាន់ គឺជ្រៀតជ្រែកកិច្ចការផ្ទៃក្នុងរបស់ប្រទេសចិនដោយមិនដឹងខ្លួន និងបញ្ជូនសញ្ញាខុសធ្ងន់ធ្ងរមួយទៅកាន់កងកម្លាំងទាមទារឯករាជ្យតៃវ៉ាន់ ដែលធ្វើឲ្យប៉ះពាល់យ៉ាងធ្ងន់ធ្ងរដល់សន្តិភាព និងស្ថិរភាពនៅច្រកសមុទ្រតៃវ៉ាន់។
អ្នកនាំពាក្យរូបនេះ ក៏បានជំរុញឲ្យសហរដ្ឋអាមេរិក យល់ឲ្យបានពេញលេញអំពីភាពរសើបនៃបញ្ហាតៃវ៉ាន់ គោរពយ៉ាងខ្ជាប់ខ្ជួនតាមគោលការណ៍ចិនតែមួយ និងសេចក្តីថ្លែងការណ៍រួមចិន-អាមេរិកចំនួនបី។
លោក ក៏បានបន្ថែមថា សហរដ្ឋអាមេរិកគួរតែប្រុងប្រយ័ត្នខ្ពស់ក្នុងការដោះស្រាយបញ្ហាទាក់ទងនឹងតៃវ៉ាន់ បញ្ឈប់ការបំពាក់អាវុធដល់កោះនេះតាមមធ្យោបាយណាមួយ និងចាត់វិធានការជាក់ស្តែងដើម្បីការពារស្ថានភាពទូទៅនៃទំនាក់ទំនងទ្វេភាគីរវាងប្រទេសទាំងពីរ និងយោធាពីរ៕
ដោយ៖ ពេជ្រ
