កីឡាករ កីឡាការិនីចំនួន៣៧ប្រទេស នឹងមកជួបគ្នា នៅលើទឹកដីខេត្តព្រះសីហនុ ដើម្បីធ្វើការប្រកួតគ្នា ក្នុងព្រឹត្តិការណ៍ប្រដាល់គុនខ្មែរជើងឯកពិភពលោក ឆ្នាំ២០២៥ (Kun Khmer World Championship 2025) ពីថ្ងៃទី១៧ ដល់ទី ២០ ខែធ្នូ ហើយកម្មវិធីនេះ ក៏មានការប្រកួតដណ្តើមខ្សែក្រវាត់គុនខ្មែរពិភពលោក កម្រិតអាជីពរវាងជើងខ្លាំងរបស់កម្ពុជា៨នាក់ ទល់នឹងអ្នកប្រដាល់អន្តរជាតិផងដែរ។
លោក ខូវ ឆាយ អគ្គលេខាធិការស្តីទីសហព័ន្ធគុនខ្មែរអន្តរជាតិ បានថ្លែងបញ្ជាក់ក្នុងសន្និសីទកាសែត នៅក្រុងព្រះសីហនុ ខេត្តព្រះសីហនុ កាលពីថ្ងៃអាទិត្យ ទី ២៣ ខែវិច្ឆិកាថា ចំពោះប្រទេសទាំង៣៧នេះ គឺប្រទេសចំនួន២៣ បានបញ្ជូនបញ្ជីឈ្មោះកីឡាករមកចូលរួមរួចហើយ ចំណែក១៤ប្រទេសទៀត កំពុងត្រៀមបញ្ជូនបញ្ជីឈ្មោះកីឡាករមកតាមក្រោយ។
កីឡាករ-កីឡាការិនីទាំង៣៧ប្រទេសនោះ មាន៖ សហរដ្ឋអាមេរិក ចិន បារាំង អេស្ប៉ាញ នូវែលសេឡង់ អាល្លឺម៉ង មិចស៊ិចកូ អាហ្វ្រិកខាងត្បូង ប៊ុលហ្គារី រុស្ស៊ី ឥណ្ឌា អ៊ុយក្រែន ជប៉ុន អ៊ីរ៉ង អ៊ីរាក់ អាហ្វហ្គានីស្ថាន នេប៉ាល់ ហ្វីលីពីន ម៉ាឡេស៊ី ឡាវ វៀតណាម កាមេរូន តុងហ្គោ កាហ្សាក់ស្ថាន កៀហ្ស៊ីស៊ីស្ថានតូមិននីស្ថាន អ៊ូសបេគីស្ថាន ប៉ាគីស្ថាន មីយ៉ាន់ម៉ា កាណាដា ស្វីស ហុងគ្រី អាហ្សង់ទីន ហូឡង់ អ៊ីតាលី ហុងកុង និងប្រេស៊ីល។
ចំពោះបេក្ខភាពកីឡករជួរមុខរបស់កម្ពុជា ដែលត្រូវប្រកួតដណ្តើមខ្សែក្រវាត់កម្រិតអាជីពនេះ រួមមាន ធន់ រិទ្ធី, ឈឿង ល្វៃ, អេ អាំម៉ារីនភូថង, ម៉ឺន មេឃា, ពេជ្រ សម្បត្តិ, បឺត សង្ឃឹម, ឡៅ ចិត្រា និង ឈុត សេរីវ៉ាន់ថង៕
