ក្រសួងយុត្តិធម៌អ៊ីស្រាអែល បានលើកឡើង នៅក្នុងសេចក្តីថ្លែងការណ៍មួយ នៅព្រឹកថ្ងៃសៅរ៍នេះថា ក្រុងយេរ៉ូសាឡឹម នឹងដោះលែងអ្នកទោសប៉ាឡេស្ទីនចំនួន ៧៣៥ នាក់ សម្រាប់ដំណាក់កាលដំបូងនៃបទឈប់បាញ់នៅតំបន់ហ្គាហ្សា និងកិច្ចព្រមព្រៀងដោះលែងចំណាប់ខ្មាំងដែលយល់ព្រមជាមួយក្រុមហាម៉ាស។
កិច្ចព្រមព្រៀងនេះ ត្រូវបានគេរំពឹងថានឹងចូលជាធរមាននៅថ្ងៃអាទិត្យ ដែលរួមបញ្ចូល ៣ ដំណាក់កាលសំខាន់ៗ ។ ដំណាក់កាលទី ១ នឹងមានរយៈពេល ៦ សប្តាហ៍ ក្នុងអំឡុងពេលដែលចំណាប់ខ្មាំងអ៊ីស្រាអែលចំនួន ៣៣ នាក់ ត្រូវដោះលែង។
សេចក្តីថ្លែងការណ៍របស់ក្រសួង ចេញផ្សាយភ្លាមៗបន្ទាប់ពីរដ្ឋាភិបាលអ៊ីស្រាអែល បានអនុម័តកិច្ចព្រមព្រៀងនេះ ដោយបើកផ្លូវសម្រាប់ការអនុវត្ត ចាប់ពីថ្ងៃអាទិត្យ។
ទន្ទឹមនោះ ក្រសួង ក៏បានបញ្ចេញឈ្មោះអ្នកទោសទាំងអស់ដែលត្រូវដោះលែង លើកលែងតែអនីតិជនចំនួន ២៥ នាក់ ដែលមានអាយុចន្លោះពី ១៦ ទៅ ១៨ឆ្នាំ។
នៅក្នុងសេចក្តីថ្លែងការណ៍ ក្រសួង បានបញ្ជាក់ថា អ្នកទោសចំនួន ៩៥នាក់ គ្រោងនឹងដោះលែងនៅថ្ងៃអាទិត្យ ដែលក្នុងនោះមានស្ត្រីចំនួន ៧០នាក់ និងបុរស ២៥នាក់ផងដែរ។
គួរបញ្ជាក់ថា ចំណាប់ខ្មាំងជនស៊ីវិលអ៊ីស្រាអែល ៣ នាក់ ត្រូវបានគេរំពឹងថានឹងត្រូវដោះលែង នៅថ្ងៃអាទិត្យ ក្នុងការដោះដូរ ៕
ដោយ៖ ពេជ្រ
