ប៉ូលិសកូរ៉េខាងត្បូង កំពុងសម្រុកចូលទៅចាប់ខ្លួនលោក Yoon Suk Yeol ដែលត្រូវបានចោទប្រកាន់ពីបទបះបោរដល់អគារប្រធានាធិបតី ប៉ុន្តែត្រូវអង្គភាពគាំទ្រលោក រារាំង។ នេះបើយោងតាមទីភ្នាក់ងារសារព័ត៌មានកូរ៉េខាងត្បូង Yonhap រាយការណ៍។
យោងតាមរបាយការណ៍ អ្នកស៊ើបអង្កេតមកពីទីភ្នាក់ងារប្រឆាំងអំពើពុករលួយរបស់រដ្ឋ បានចូលទៅក្នុងអគាររបស់ប្រធានាធិបតី នៅថ្ងៃសុក្រនេះ ដើម្បីអនុវត្តដីកាឃុំខ្លួនដែលចោទប្រកាន់លើលោក Yoon Suk Yeol ជុំវិញការប្រកាសដាក់ច្បាប់អាជ្ញាសឹក កាលពីខែមុន ។
ទោះបីជាយ៉ាងណាក៏ដោយ ក្រុមអ្នកអនុវត្តច្បាប់ ត្រូវបានរារាំងដោយកម្លាំងយោធាគាំទ្រ លោក Yoon នៅពេលអនុវត្តដីកាឃុំខ្លួនប្រធានាធិបតី ។
ទន្ទឹមនោះ ការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ (CIO) បានឲ្យដឹង នៅក្នុងសេចក្តីជូនដំណឹងមួយទៅកាន់សារព័ត៌មានថា ខ្លួនចាប់ផ្តើមអនុវត្តដីកានេះ ប៉ុន្តែមន្ត្រីប៉ូលិសថា អ្នកស៊ើបអង្កេតត្រូវរារាំងមិនឱ្យចូលទៅក្នុងអគារស្នាក់នៅដោយអង្គភាពយោធាដែលសន្មតថាជាកម្មសិទ្ធិនៃទីបញ្ជាការការពាររាជធានី ។
ការិយាល័យស៊ើបអង្កេតអំពើពុករលួយ កំពុងពិនិត្យមើលស្ថានភាពនៃការប្រកាសច្បាប់អាជ្ញាសឹកដោយប្រធានាធិបតីដែលត្រូវបានចោទប្រកាន់ពីបទបះបោរ បន្ទាប់ពីការផ្លាស់ប្តូរនេះ។
ក្រុម CIO បានដាក់ដីកាឃុំខ្លួនចូលជាធរមាន នៅថ្ងៃទី ៣០ ខែធ្នូ មួយថ្ងៃបន្ទាប់ពី លោក Yoon Suk Yeol ខកខានក្នុងការបង្ហាញខ្លួនមុខតុលាការ ជាលើកទី ៣ ។
គួរបញ្ជាក់ថា ច្បាប់កូរ៉េខាងត្បូង អនុញ្ញាតឱ្យកាត់ទោសប្រធានាធិបតីដែលកាន់អំណាចក្នុងករណីក្បត់ជាតិ ឬការបះបោរ។ មេធាវីការពារក្តីរបស់ប្រធានាធិបតី បានទទូចថា ទីភ្នាក់ងារនេះគ្មានសិទ្ធិអំណាចក្នុងការស៊ើបអង្កេតករណីបះបោរទេ ៕
ដោយ៖ ពេជ្រ
