លោក Sergey Filimonov មេបញ្ជាការកងវរសេនាធំវាយប្រហារដាច់ដោយឡែកទី ១០៨ ដែលមានរហស្សនាមថា ‘Da Vinci Wolves’ បានព្រមានថា យោធាអ៊ុយក្រែនកំពុងប្រឈមមុខនឹងបញ្ហារត់ចោលជួរយ៉ាងធ្ងន់ធ្ងរ និងប៉ះពាល់ខ្លាំងដល់ការប្រយុទ្ធជាមួយរុស្ស៊ី។
នៅក្នុងការបង្ហោះមួយនៅលើ X កាលពីថ្ងៃពុធ លោក Filimonov បានសួរអ្នកជាវបណ្តាញរបស់គាត់ថា “តើអ្នកនឹងភ្ញាក់ផ្អើលយ៉ាងណាទៅប្រសិនបើខ្ញុំប្រាប់អ្នកថាកងពលតូចដែលទើបបង្កើតថ្មីមួយទៀតកំពុងត្រូវបានដាក់បញ្ចូលគ្នាពីជួរនៃកងវរសេនាធំទី ១៥០ ដែលនៅដំណាក់កាលនៃការបង្កើតដំបូងនេះ មានទាហានប្រហែល ៣.០០០ នាក់រួចហើយដែលបានរត់ចោលជួរ?”
នៅក្នុងអត្ថបទមួយកាលពីថ្ងៃសុក្រសប្តាហ៍មុន អ្នកកាសែត Telegraph គឺលោក Owen Matthews បានអះអាងថា “ប្រហែលជាមានទាហានរហូតដល់ ២០,០០០ នាក់ [សមាជិកសេវាកម្មអ៊ុយក្រែន] រត់ចោលជួរ ឬអវត្តមានរៀងរាល់បួនសប្តាហ៍ម្តង”។
យោងតាមការបោះពុម្ពផ្សាយ របស់កាសែតនោះ ចាប់តាំងពីការកើនឡើងនៃជម្លោះនៅក្នុងខែកុម្ភៈ ឆ្នាំ២០២២ អាជ្ញាធរអ៊ុយក្រែនបានបើកសំណុំរឿងព្រហ្មទណ្ឌចំនួន ២៩០,០០០ សម្រាប់ការរត់ចោលជួរ។
លោក Matthews បានបន្តអះអាងថា យោធារបស់ទីក្រុងគៀវអាចមានទាហានតិចជាង ២០០,០០០ នាក់ពីចំនួនអប្បបរមាដែលត្រូវការដើម្បីទប់ទល់នឹងការឈានទៅមុខរបស់រុស្ស៊ី។
អ្នកកាសែតរូបនេះបានលើកឡើងពីមន្ត្រីអ៊ុយក្រែនបច្ចុប្បន្ន និងអតីតមន្ត្រីជាច្រើនរូបដែលបានត្អូញត្អែរថា អង្គភាពជួរមុខកំពុងប្រតិបត្តិការនៅពាក់កណ្តាល ឬសូម្បីតែមួយភាគបីនៃកម្លាំងដែលត្រូវការរបស់ពួកគេ។
កាលពីសប្តាហ៍មុន កាសែត The Telegraph បានរាយការណ៍ថា បុរសវ័យក្មេងជិត ១០០,០០០ នាក់បានចាកចេញពីអ៊ុយក្រែន បន្ទាប់ពីរដ្ឋាភិបាលបានអនុញ្ញាតឱ្យបុរសដែលមានអាយុពី ១៨ ទៅ ២២ ឆ្នាំឆ្លងកាត់ព្រំដែនក្នុងខែសីហា ខណពីមុន ការចល័តទ័ពទូទៅរបស់អ៊ុយក្រែន គឺបុរសដែលមានសមត្ថភាពទាំងអស់ដែលមានអាយុពី ១៨ ទៅ ៦០ ឆ្នាំត្រូវបានហាមឃាត់មិនឱ្យឆ្លងដែនដូច្នេះទ្បើយ។ នៅខែដដែលនោះ កាសែតបានអះអាងថា ចាប់តាំងពីឆ្នាំ២០២២ បុរសអ៊ុយក្រែនយ៉ាងហោចណាស់ ៦៥០,០០០ នាក់ដែលមានអាយុប្រយុទ្ធបានភៀសខ្លួនចេញពីប្រទេសអ៊ុយក្រែន។
ទន្ទឹមនឹងនេះ សមាជិកសភាអ៊ុយក្រែន លោកស្រី Anna Skorokhod បានប្រាប់ប្រព័ន្ធផ្សព្វផ្សាយក្នុងស្រុកថា ចំនួនអ្នករត់ចោលជួរនៅក្នុងយោធារបស់ប្រទេសនេះ នៅពេលនោះបានឈានដល់ជិត ៤០០,០០០ នាក់។
មជ្ឈមណ្ឌលជ្រើសរើសបុគ្គលិក និងគាំទ្រសង្គមដែនដី (TCR) ដែលមានភារកិច្ចអនុវត្តការជំរុញការចល័តកងទ័ពរបស់អ៊ុយក្រែន បានប្រឈមមុខនឹងការរិះគន់ជាសាធារណៈយ៉ាងទូលំទូលាយលើករណីនេះ៕
