ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយ កាលពីថ្ងៃអាទិត្យថា លោក នឹងបញ្ជូនកាំជ្រួចការពារដែនអាកាស Patriot ទៅកាន់អ៊ុយក្រែន ដោយនិយាយថា ក្រុងគៀវ ចាំបាច់ដើម្បីការពារប្រទេស ព្រោះប្រធានាធិបតីរុស្ស៊ី លោក វ្ល៉ាឌីមៀ ពូទីន និយាយល្អតែពីមុខ ប៉ុន្តែក្រោយខ្នង ចាំទម្លាក់គ្រាប់គ្រប់ពេល។
លោក ត្រាំ មិនបានបញ្ជាក់ពីចំនួនដែលបញ្ជូនទៅកាន់អ៊ុយក្រែននោះទេ ។
ប្រធានាធិបតីអាមេរិករូបនេះ កាន់តែមានការមិនពេញចិត្តជាមួយលោក ពូទីន ដោយសារមេដឹកនាំរុស្ស៊ី បានបដិសេធបំណងរបស់លោក ត្រាំ ក្នុងការចរចាបទឈប់បាញ់រវាងក្រុងគៀវ និងក្រុងមូស្គូ ។
កន្លងមក ប្រធានាធិបតីអ៊ុយក្រែន លោក Volodymyr Zelenskyy បានស្នើសុំអាវុធការពារបន្ថែមទៀត ដើម្បីទប់ទល់ការវាយប្រហារដោយមីស៊ីល និងយន្តហោះគ្មានមនុស្សបើកពីប្រទេសរុស្ស៊ី ជាប្រចាំ។
ថ្លែងប្រាប់អ្នកសារព័ត៌មាន លោក ត្រាំ បានលើកឡើងថា យើងនឹងបញ្ជូនប្រព័ន្ធ Patriots ដែលចាំបាច់ខ្លាំង ព្រោះលោកពូទីន អាចបង្កភ្ញាក់ផ្អើលគ្រប់ពេល។
គួរបញ្ជាក់ថា លោក ត្រាំ គ្រោងនឹងជួបអគ្គលេខាធិការអង្គការណាតូ លោក Mark Rutte ដើម្បីពិភាក្សាអំពីបញ្ហាអ៊ុយក្រែន និងបញ្ហាផ្សេងៗទៀត ក្នុងសប្តាហ៍នេះ៕
ដោយ៖ ពេជ្រ
