លោក Dan Eddy ប្រធានផ្នែកសង្គ្រោះអគ្គីភ័យក្រុង San Diego បាននិយាយថា មនុស្ស ២ នាក់ស្លាប់ និង ៨ នាក់រងរបួស នៅក្នុងហេតុការណ៍ធ្លាក់យន្តហោះ Cessna 550 ក្នុងទីតាំងលំនៅដ្ឋានយោធាមួយកន្លែងក្នុងទីក្រុង San Diego រដ្ឋកាលីហ្វ័រញ៉ា ។
ទោះជាយ៉ាងណា អាជ្ញាធរក្នុងតំបន់ បានព្រមានថា តួលេខអ្នកស្លាប់ អាចនឹងកើនឡើងបន្ថែមទៀត ផងដែរ។
ទន្ទឹមនោះ ឧបទ្ទវហេតុនេះ កំពុងត្រូវបានស៊ើបអង្កេតដោយរដ្ឋបាលអាកាសចរណ៍សហព័ន្ធ (FAA)។ ក្រុមប្រឹក្សាសុវត្ថិភាពដឹកជញ្ជូនជាតិ (NTSB) ត្រូវបានគេរំពឹងថានឹងចូលរួមជាមួយផងដែរ ក្នុងពេលឆាប់ៗនេះ។
គួរបញ្ជាក់ថា យន្តហោះ Cessna 550 បានធ្លាក់ក្នុងការតាំងទីលំនៅដ្ឋាន Murphy Canyon នៅភាគខាងជើងនៃទីក្រុង កាលពីព្រឹកមិញ ដោយបណ្ដាលឲ្យឆេះផ្ទះអស់ ១៥ខ្នង។ មូលហេតុនៃការធ្លាក់នេះ នៅមិនទាន់ដឹងច្បាស់នៅឡើយទេ ប៉ុន្តែគេរាយការណ៍ថា ពេលយន្តហោះធ្លាក់ តំបន់នោះមានគ្របដណ្តប់ដោយអ័ព្ទយ៉ាងក្រាស់៕
ដោយ៖ ពេជ្រ
