ទាហានអ៊ីស្រាអែលបានធ្វើការបាញ់ព្រមានទៅលើក្រុមអ្នកការទូតក្នុងទីក្រុង Jenin ក្នុងតំបន់ West Bank កាលពីថ្ងៃពុធម្សិលមិញ ខណដែលកងកម្លាំងការពារអ៊ីស្រាអែលបានអះអាងថា ក្រុមអ្នកការទូតនេះបានចូលទៅក្នុងតំបន់ហាមឃាត់ដោយគ្មានការអនុញ្ញាត។ យ៉ាងណាក៏ដោយគ្មានអ្នកណាម្នាក់រងរបួសនោះទេក្នុងករណីបាញ់ព្រមានដ៏គួរឲ្យភ្ញាក់ផ្អើលនេះ។
ទីភ្នាក់ងារសារព័ត៌មានប៉ាឡេស្ទីន WAFA បាននិយាយថា គណៈប្រតិភូមានអ្នកការទូតមកពីប្រទេសយ៉ាងតិច២០ប្រទេស រួមទាំងប្រទេសជប៉ុនផងដែរ។ ពួកគេបានទៅទស្សនាទីក្រុងនេះ ដើម្បីវាយតម្លៃស្ថានភាព។
ប្រធានគោលនយោបាយការបរទេសរបស់សហភាពអឺរ៉ុបលោកស្រី Kaja Kallas បានសម្តែងការខឹងសម្បារយ៉ាងខ្លាំងចំពោះហេតុការណ៍ដ៏គួរឲ្យភ័យខ្លាចនេះ។ លោកស្រីបាននិយាយថា យើងពិតជាអំពាវនាវឱ្យអ៊ីស្រាអែលស៊ើបអង្កេតឧប្បត្តិហេតុនេះ ហើយថែមទាំងទទួលខុសត្រូវចំពោះរឿងនេះ ដើម្បីឲ្យដឹងថា តើអ្នកណាពិតប្រាកដដែលត្រូវទទួលខុសត្រូវចំពោះរឿងនេះ ហើយការគំរាមកំហែងណាមួយលើជីវិតអ្នកការទូតគឺមិនអាចទទួលយកបាននោះទ្បើយ។
មន្ត្រីជាន់ខ្ពស់នៃក្រសួងការបរទេសជប៉ុនបានពណ៌នាការបាញ់ប្រហារនេះថា ជាហេតុការណ៍គួរឱ្យសោកស្តាយ ហើយបាននិយាយថា រដ្ឋាភិបាលបានដាក់ការតវ៉ារួចហើយលើរឿងនេះ។ ទន្ទឹមនោះជប៉ុនក៏បានអំពាវនាវឲ្យអ៊ីស្រាអែលដាក់វិធានការដើម្បីចៀសវាងរឿងដដែលនេះកើតឡើងម្តងទៀត។
ទាហានអ៊ីស្រាអែលបាននិងកំពុងធ្វើការវាយឆ្មក់នៅក្រុង Jenin ក្នុងកិច្ចប្រឹងប្រែងដើម្បីកម្ចាត់ពួកសកម្មប្រយុទ្ធ។ ការប្រយុទ្ធគ្នាបានបង្ខំអ្នកស្រុកជាច្រើននាក់ត្រូវភៀសខ្លួនចេញពីផ្ទះសម្បែង៕
ដោយ៖ ពេជ្រ
