វេណេហ្ស៊ុយអេឡា បានផ្អាកជើងហោះហើរទាំងអស់ទៅ និងមកពីប្រទេសកូឡុំប៊ី បន្ទាប់ពីអាជ្ញាធរ រកឃើញថាអាចមានផែនការដើម្បីរត់ពន្ធគ្រឿងផ្ទុះចូលទៅក្នុងប្រទេស តាមរយៈអាកាសយានដ្ឋានកូឡុំប៊ី កាលពីថ្ងៃចន្ទ។
រដ្ឋមន្ត្រីមហាផ្ទៃ លោក Diosdado Cabello បាននិយាយថា ការផ្អាកនេះគឺដើម្បីឆ្លើយតបទៅនឹងផែនការអស្ថិរភាពដែលមិនបើកចំហរ រួមមានទាំងការទម្លាក់គ្រាប់បែកលើស្ថានទូតបរទេស ស្ថានីយ៍ប៉ូលីស និងកន្លែងថែទាំសុខភាពក្នុងប្រទេសវេណេហ្ស៊ុយអេឡា។
លោក Cabello បានបន្ថែមថា យើងសម្រេចចិត្តផ្អាកជាបន្ទាន់រាល់ចរាចរណ៍ផ្លូវអាកាសរវាងប្រទេសវេណេហ្ស៊ុយអេឡា និងកូឡុំប៊ី ដោយបន្តថា វិធានការណ៍នេះគឺជាវិធានការសន្តិសុខដើម្បីការពារការជ្រៀតចូលបន្ថែមទៀត។
លោករដ្ឋមន្ត្រី ក៏បានកត់សម្គាល់ថា ផែនការវាយប្រហារនេះមានគោលបំណងរំខានដល់ការបោះឆ្នោតជ្រើសតាំងតំណាងរាស្រ្តថ្នាក់ជាតិ និងថ្នាក់តំបន់ ដែលគ្រោងធ្វើនៅថ្ងៃទី ២៥ ខែឧសភា នេះ៕
ដោយ៖ ពេជ្រ
