ប្រធានាធិបតីអ៊ុយក្រែន លោក Volodymyr Zelenskyy បានបង្ហាញថា បុរសជនជាតិចិនពីរនាក់ដែលប្រយុទ្ធដើម្បីរុស្ស៊ីត្រូវបានចាប់ខ្លួន។ លោកថា រដ្ឋាភិបាលរបស់លោកក៏កំពុងទាមទារឲ្យមានការពន្យល់ពីប្រទេសចិន លើករណីនេះ។
នៅក្នុងសន្និសីទសារព័ត៌មានក្នុងទីក្រុង Kyiv កាលពីថ្ងៃអង្គារ លោកZelensky បាននិយាយថា កងកម្លាំងអ៊ុយក្រែនបានចាប់បុរសអ្នកទោសនៅតំបន់ Donetsk ភាគខាងកើត។ លោកថា កងកម្លាំងអ៊ុយក្រែនបានជួបពួកគេជាមួយពលរដ្ឋចិនបួននាក់ផ្សេងទៀតដែលកំពុងប្រយុទ្ធនៅទីនោះដោយគេចូលរួមជាមួយនឹងទាហានរុស្ស៊ី។
លោក Zelenskyy បានលើកទ្បើងថា “ចិនកំពុងប្រយុទ្ធនៅលើទឹកដីអ៊ុយក្រែន។ ហើយខ្ញុំគិតថានេះគឺជាចំណុចសំខាន់ដែលយើងត្រូវពិភាក្សាជាមួយដៃគូរបស់យើង ហើយខ្ញុំគិតថាវាជារឿងបន្ទាន់”។ លោកបានបន្ថែមថា សហរដ្ឋអាមេរិកត្រូវយកចិត្តទុកដាក់ចំពោះស្ថានការណ៍បែបនេះ។
លោកក៏បានសរសេរនៅក្នុងការបង្ហោះនៅលើ X ថាលោកមានព័ត៌មានដែលអះអាងថា នៅមានពលរដ្ឋចិនជាច្រើនទៀត នៅក្នុងអង្គភាពកងកម្លាំងរុស្ស៊ី។ លោកបន្ថែមថា មន្ត្រីចារកម្ម និងសន្តិសុខកំពុងស៊ើបអង្កេតលើករណីនេះ។
ចំណែកប្រទេសចិនបានលើកទ្បើងថា ខ្លួនបាននិងកំពុងបង្កើនទំនាក់ទំនងជាមួយរុស្ស៊ី ប៉ុន្តែខ្លួនមិនបានផ្តល់ជំនួយផ្នែកយោធានោះទេ។
រដ្ឋមន្ត្រីការបរទេសអ៊ុយក្រែនលោក Andrii Sybiha បានបង្ហោះនៅលើ X អំពីឧប្បត្តិហេតុនេះ។ លោកបាននិយាយថា វាចោទជាសំណួរអំពីជំហរដែលបានប្រកាសរបស់ចិនសម្រាប់សន្តិភាព និងធ្វើឱ្យប៉ះពាល់ដល់ភាពជឿជាក់របស់ខ្លួនក្នុងនាមជាសមាជិកអចិន្ត្រៃយ៍ដែលទទួលខុសត្រូវ នៃក្រុមប្រឹក្សាសន្តិសុខអង្គការសហប្រជាជាតិ។ លោកក៏បានលើកឡើងថា លោកបានកោះហៅភារធារីចិននៅអ៊ុយក្រែនដើម្បីទាមទារឲ្យមានការពន្យល់៕
ដោយ៖ ពេជ្រ
