អគ្គីភ័យបានលេបត្របាក់កុដិលោក១ខ្នងអស់ទាំងស្រុង រួមទាំងទ្រព្យសម្បត្តិមួយចំនួនធំ នៅស្រុកវើនសៃ

ខេត្តរតនគីរី÷ កុដិលោក១ខ្នងនៅស្រុកវើនសៃត្រូវបានអគ្គីភ័យឆាបឆេះអស់ទាំងស្រុង រួមទាំងទ្រព្យសម្បត្តិអស់មួយចំនួនធំ ប៉ុន្តែមិនមានគ្រោះថ្នាក់ដល់លោកសង្ឃនោះឡើយ។ហេតុការណ៍នេះបានកើតឡើងនៅវេលាម៉ោង៨និង០០នាទីយប់ថ្ងៃទី២៣ ខែមីនា ឆ្នាំ២០២៥ កុដិលោក១ខ្នងស្ថិតក្នុងភូមិប៉ុង ឃុំប៉ុង ស្រុកវើនសៃ ខេត្តរតនគិរី។

លោក ភិន ឡយ អធិការនគរបាលស្រុកវើនសៃ បានឲ្យដឹងថាលោកសង្ឃ១អង្គនៅក្នុងវត្តនិងគណៈកម្មការអាចារ្យវត្តបានពុទ្ធដីកាថា ដោយលោកសង្ឃ១អង្គបានដុតទៀនរួចហើយក៏បានចុះមកក្រោមកុដិមួយសន្ទុះក្រោយមក ក៏បានឃើញអណ្ដាតភ្លើងឆាបឆេះយ៉ាងសន្ធោសន្ធៅ ក៏នាំគ្នារត់ទៅពន្លត់ប៉ុន្តែពន្លត់មិនរលត់ខណ:ដោយសារភ្លើងឆាបឆេះខ្លាំងពេក។

លោកអធិការស្រុកវើនសៃ បានបញ្ជាក់ថា កុដិលោក១ខ្នងដែលឆាបឆេះនេះមានទំហ៊ំ ៧ម៉ែត្រ គុណ ៨ម៉ែត្រ ធ្វើអំពីឈើ ប្រក់ស័ង្កសី ក្រាលក្តារ បាំងក្តារ បន្ទាប់មករថយន្តពន្លត់អគ្គីភ័យបានចុះទៅធ្វើការអន្តរាគមន៍ពន្លត់ភ្លើងប្រើប្រាស់រថយន្តបាញ់ទឹក១គ្រឿង ប៉ុន្តែជាអកុសលភ្លើងបានឆេះខ្លាំងពេកមិនអាចជួយអន្តរាគមន៍បានទេ។

សម្ភារដែលខូចខាតរួមមាន: ១-ព្រះធ្វើអំពីស្ពាន់ចំនួន១អង្គ(តូច)។ ២-កង្ហារចំនួន៤។ ៣- សញ្ញាបត្របឋមភូមិ១សន្លឹក។ ៤-សញ្ញាបត្រទុតិយភូមិ១សន្លឹក។