បេសកជនអាមេរិកនៅមជ្ឈិមបូព៌ានិយាយថា ប្រធានាធិបតីលោកDonald Trump នឹងជួបពិភាក្សាជាមួយសមភាគីរុស្ស៊ីនៅសប្តាហ៍នេះ អំពីការចរចាដែលមានបំណងសម្រេចបានបទឈប់បាញ់នៅអ៊ុយក្រែន។លោក Steve Witkoff បេសកជនពិសេសរបស់ Trump បានចែករំលែកព័ត៌មាននេះក្នុងអំឡុងពេលសម្ភាសន៍ជាមួយ CNN កាលពីថ្ងៃអាទិត្យ។
លោក Witkoff បានជួបជាមួយប្រធានាធិបតីរុស្ស៊ី លោក Vladimir Putin នៅទីក្រុងមូស្គូ កាលពីថ្ងៃព្រហស្បតិ៍កន្លងទៅ។ គាត់បាននិយាយថា “ការពិភាក្សានោះគឺធ្វើនៅកន្លែងណាមួយរវាង ៣ ទៅ ៤ ម៉ោង ហើយវាមានភាពវិជ្ជមានសម្រាប់សន្តិភាពអ៊ុយក្រែន។
ប្រេសិតរូបនេះបានបន្ថែមថា មានរឿងជាច្រើនដែលត្រូវពិភាក្សា។ ប៉ុន្តែលោកគិតថា ប្រធានាធិបតីទាំងពីរនឹងមានការពិភាក្សាដ៏ល្អ និងវិជ្ជមានក្នុងសប្តាហ៍នេះ។ ទន្ទឹមនឹងនេះ យោធាអ៊ុយក្រែនក៏បានបញ្ចេញផែនទីសមរភូមិចុងក្រោយរបស់ខ្លួននៅលើប្រព័ន្ធផ្សព្វផ្សាយសង្គមកាលពីថ្ងៃអាទិត្យផងដែរ។ ផែនទីមួយក្នុងចំណោមផែនទីនោះបានបង្ហាញថា កងកម្លាំងអ៊ុយក្រែនបានដកថយទាំងស្រុងពីទីក្រុង Sudzha ក្នុងតំបន់ Kursk ដែលអ៊ុយក្រែនបានដណ្តើមយកទីក្រុងនេះភ្លាមៗបន្ទាប់ពីបានចាប់ផ្តើមការវាយប្រហារឆ្លងដែនរបស់ខ្លួនចូលរុស្ស៊ី។
កាលពីថ្ងៃព្រហស្បតិ៍ ទីក្រុងម៉ូស្គូបានអះអាងថាខ្លួនបានដណ្តើមយកទីក្រុងនេះឡើងវិញហើយ ហើយក៏បានបង្ហាញផែនទីដើម្បីបញ្ជាក់ការអះអាង។
អ៊ុយក្រែនចង់ប្រើទឹកដីដែលខ្លួនដណ្តើនមបានក្នុងតំបន់ Kursk ជាបន្ទះសៀគ្វីចរចាជាមួយរុស្ស៊ី។ ការដកកងកម្លាំងរបស់ខ្លួនចេញពី Sudzha អាចត្រូវបានគេមើលឃើញថាជាការថយក្រោយនៃកងទ័ពអ៊ុយក្រែន ប៉ុន្តែរុស្ស៊ីថា មិនមែនអ៊ុយក្រែនដកទ័ពចេញនោះទេ តែរុស្ស៊ីបានវាយដណ្តើមយកមកវិញ៕
ដោយ៖ ពេជ្រ
