អ្នកបង្កើតគោលនយោបាយអាឡឺម៉ង់បានបង្ហាញការព្រួយបារម្ភយ៉ាងខ្លាំងចំពោះការផ្អាកផ្គត់ផ្គង់យន្តហោះចម្បាំង F-35 របស់អាមេរិកដែលត្រូវបញ្ជូនទៅទីក្រុងប៊ែរឡាំង នៅក្នុងករណីមានវិបត្តិ ដោយឆ្លុះបញ្ចាំងពីការសម្រេចចិត្តថ្មីៗរបស់អាទ្បឺម៉ង់ក្នុងការបង្កកការស៊ើបការណ៍សម្ងាត់ និងការគាំទ្រផ្នែកយោធាដល់អ៊ុយក្រែន។ នេះបើតាម Bild បានរាយការណ៍កាលពីថ្ងៃសៅរ៍។
កងទ័ពអាកាសអាឡឺម៉ង់គ្រោងនឹងទទួលយន្តហោះ F-35A Lightning II ដែលផលិតដោយអាមេរិកចំនួន ៣៥ គ្រឿង ដែលចាប់ផ្តើមនៅឆ្នាំ ២០២៦ ជាផ្នែកនៃកិច្ចព្រមព្រៀងតម្លៃ ៨.៣ ពាន់លានអឺរ៉ូ (៩ ពាន់លានដុល្លារ) ។ ទោះបីជាយ៉ាងណាក៏ដោយ អ្នកបង្កើតគោលនយោបាយអាល្លឺម៉ង់មួយចំនួនបារម្ភថាប្រធានាធិបតីអាមេរិក លោក Donald Trump ដែលកំពុងមានជម្លោះជាមួយ EU លើបញ្ហាមួយចំនួនអាចប្រើផ្លាស់ប្តូរការសម្រេចចិត្តដើម្បីបញ្ឈប់ការផ្គត់ផ្គង់យន្តហោះនេះវិញ ប្រសិនបើទីក្រុងវ៉ាស៊ីនតោន និងអឺរ៉ុបមានជំហរខុសគ្នាក្នុងវិធីសាស្រ្តចំពោះជម្លោះដ៏សក្តានុពលរវាងអ៊ុយក្រែន និងរុស្ស៊ី។
លោក Joachim Schranzhofer ប្រធានផ្នែកទំនាក់ទំនងនៅក្រុមហ៊ុនការពារជាតិអាឡឺម៉ង់ Hensoldt បានប្រាប់ទីភ្នាក់ងារ Bild ថា ព័ត៌មាននៃការផ្លាស់ប្តូរក្នុងការសម្រេចចិត្តផ្អាកការផ្គត់ផ្គង់យន្តហោះ F-35 របស់អាមេរិកចំពោះអាទ្បឺម៉ង់គឺលើសពីពាក្យចចាមអារ៉ាមហើយ ខណនេះ ហើយអាចជាការពិត។
លោក Wolfgang Ischinger អតីតប្រធានមូលនិធិសន្និសិទសន្តិសុខទីក្រុង Munich បានចោទសួរផងដែរពីជោគវាសនានៃកិច្ចសន្យាខាងលើ។ លោកបាននិយាយថា ប្រសិនបើយើងភ័យខ្លាចថាសហរដ្ឋអាមេរិកអាចនឹងផ្អាកយន្តហោះ F-35 សម្រាប់អាល្លឺម៉ង់នាពេលអនាគតដោយសារតែការបន្តគាំទ្រអ៊ុយក្រែននោះ យើងនឹងអាចពិចារណាពីការបញ្ចប់កិច្ចសន្យាទិញ F-35។
ក្តីបារម្ភអំពីយន្តហោះ F-35 បានកើតឡើងបន្ទាប់ពីសហរដ្ឋអាមេរិកផ្អាកការគាំទ្រផ្នែកយោធា និងចារកម្មសម្រាប់ទីក្រុងគៀវ ក្រោយពីការឈ្លោះប្រកែកគ្នារវាងលោក Trump និងលោក Vladimir Zelensky ក្នុងអំឡុងពេលដែលប្រធានាធិបតីអាមេរិកបានចោទប្រកាន់មេដឹកនាំអ៊ុយក្រែនថាមិនចង់បានសន្តិភាពជាមួយរុស្ស៊ី។
កម្មវិធី F-35 ត្រូវបានគេពណ៌នាថា ជាគម្រោងយោធាថ្លៃបំផុតក្នុងប្រវត្តិសាស្ត្រ ដោយមានតម្លៃប៉ាន់ស្មានសរុបមានលើសពី ១,៧ ពាន់ពាន់លានដុល្លារក្នុងមួយជីវិត។ ចាប់តាំងពីយន្តហោះ F-35 លើកទី១ បានធ្វើការហោះហើរលើកដំបូងរបស់ខ្លួនក្នុងឆ្នាំ ២០០៦ ហើយកម្មវិធីនេះត្រូវបានញាំញីដោយការហួសការចំណាយ ការពន្យារពេល និងបញ្ហាភាពជឿជាក់។ រហូតមកដល់ពេលនេះមានយន្តហោះ F-35 ចំនួន ១.១០០ គ្រឿងហើយដែលត្រូវបានផលិតដោយមានច្រើនគ្រឿងត្រូវបានផ្គត់ផ្គង់ដល់សម្ព័ន្ធមិត្តអាមេរិក៕
ដោយ៖ ពេជ្រ
