អ៊ីស្រាអែលឲ្យដឹងថា ខ្លួនយល់ព្រមទទួលយកសំណើររបស់សហរដ្ឋអាមេរិក ដើម្បីបន្តបទឈប់បាញ់នៅតំបន់ហ្គាហ្សាស្ទ្រីប រហូតដល់ចុងខែមេសា ជាមួយនឹងការដោះលែងចំណាប់ខ្មាំងពាក់កណ្តាលទៀតដែលកាន់កាប់ដោយក្រុមអ៊ីស្លាមហាម៉ាស។
អ៊ីស្រាអែលកំពុងបង្កើនសម្ពាធលើក្រុមហាម៉ាសឱ្យយល់ព្រមតាមសំណើដោយការរារាំងការបញ្ចូនជំនួយមនុស្សធម៌ទៅក្នុងតំបន់ហ្គាហ្សាស្ទ្រីប។ ដំណាក់កាលដំបូងនៃរយៈពេលប្រាំមួយសប្តាហ៍សម្រាប់បទឈប់បាញ់ដែលបានព្រមព្រៀងដោយអ៊ីស្រាអែល និងក្រុមហាម៉ាសបានឈានដល់ទីបញ្ចប់កាលពីថ្ងៃសៅរ៍សប្តាហ៍កន្លងទៅ។ដំណាក់កាលទីពីរនឹងឃើញការដកកងកម្លាំងអ៊ីស្រាអែលទាំងស្រុងចេញពីតំបន់ Gaza Strip ក្នុងគោលបំណងបញ្ចប់ការប្រយុទ្ធគ្នាជាអចិន្ត្រៃយ៍។
ការិយាល័យនាយករដ្ឋមន្ត្រីអ៊ីស្រាអែលបាននិយាយកាលពីថ្ងៃអាទិត្យថា ប្រទេសនេះនឹងអនុវត្តនូវក្របខ័ណ្ឌរបស់បេសកជនប្រធានាធិបតីសហរដ្ឋអាមេរិក Steve Witkoff សម្រាប់បទឈប់បាញ់បណ្តោះអាសន្នក្នុងអំឡុងពេលបុណ្យរ៉ាម៉ាដាន និងបុណ្យរំលង។ នៅថ្ងៃដំបូង ពាក់កណ្តាលនៃចំណាប់ខ្មាំង ៥៩ នាក់ដែលនៅរស់ និងស្លាប់ នឹងត្រូវបានដោះលែងដោយក្រុមហាម៉ាស។ ក្របខ័ណ្ឌនេះត្រូវបានគេរាយការណ៍ថា បានអំពាវនាវឱ្យមានការដោះលែងចំណាប់ខ្មាំងដែលនៅសេសសល់ និងស្លាប់ ប្រសិនបើកិច្ចព្រមព្រៀងត្រូវបានសម្រេចលើបទឈប់បាញ់ជាអចិន្ត្រៃយ៍។
ការិយាល័យក៏បានឲ្យដឹងផងដែរថា នាយករដ្ឋមន្ត្រី Benjamin Netanyahu បានសម្រេចចិត្តបញ្ឈប់រាល់ការបញ្ជូនទំនិញ និងការផ្គត់ផ្គង់ផ្សេងៗចូលទៅក្នុង Gaza Strip គិតត្រឹមព្រឹកថ្ងៃអាទិត្យ។យ៉ាងណាក៏ដោយ ក្រុមហាម៉ាសបានបន្តទាមទារឲ្យមានការអនុវត្តដំណាក់កាលទី២ ដែលរួមបញ្ចូលទាំងការដកចេញយ៉ាងទូលំទូលាយនៃកងកម្លាំងអ៊ីស្រាអែល បន្តដោយការដោះលែងចំណាប់ខ្មាំងទាំងអស់។ ប៉ុន្តែក្រុមហាម៉ាស់បានចោទប្រកាន់អ៊ីស្រាអែលពីការបន្តឧបាយកលដែលនឹងបង្កគ្រោះថ្នាក់ដល់អាយុជីវិតរបស់ចំណាប់ខ្មាំង៕
ដោយ៖ ពេជ្រ
