លោក Vladimir Zelensky បានបដិសេធមិនសុំទោស ជុំវិញការទាស់សម្ដីជាមួយប្រធានាធិបតីអាមេរិកលោក Donald Trump នៅសេតវិមាន នោះទេ។
ក្នុងបទសម្ភាសន៍ Fox News លោក Zelensky បាននិយាយថា ខ្ញុំគោរពប្រធានាធិបតី ខ្ញុំគោរពប្រជាជនអាមេរិក។ ខ្ញុំគិតថាយើងត្រូវបើកចំហរ និងស្មោះត្រង់បំផុត។ ហើយខ្ញុំមិនប្រាកដថាយើងបានធ្វើអ្វីអាក្រក់នោះទេ។
ទោះជាយ៉ាងណា លោក Zelensky គិតថា ទំនាក់ទំនងជាមួយមេដឹកនាំសហរដ្ឋអាមេរិក នឹងមានភាពប្រសើរឡើងវិញ។ លោក ថា វាជាទំនាក់ទំនងប្រវត្តិសាស្ត្រ ទំនាក់ទំនងដ៏រឹងមាំរវាងប្រជាជនរបស់យើង ។
គួរបញ្ជាក់ថា កាលពីព្រឹកថ្ងៃសុក្រ លោក Zelensky បានជួបជាមួយលោក Trump នៅសេតវិមាន។ ជំនួបដែល ត្រូវបានផ្សាយលើទូរទស្សន៍ភ្លាមៗ ឈានដល់ការប្រកែកគ្នា ដោយលោក Trump និយាយខ្លាំងៗលើដាក់លោក Zelensky ចំពោះការមិនគោរពដល់សហរដ្ឋអាមេរិក ។ ខណអនុប្រធានាធិបតីលោក JD Vance បាននិយាយថា លោក Zelensky មិនដែលអរគុណប្រទេសសម្រាប់ការគាំទ្រទាំងអស់ដែលផ្តល់ដល់ក្រុងគៀវ នោះទេ។ សន្និសីទសារព័ត៌មានដែលគ្រោងនឹងធ្វើតាមកិច្ចប្រជុំ ក៏ត្រូវបានលុបចោល ហើយគណៈប្រតិភូអ៊ុយក្រែន ចាកចេញពីសេតវិមានភ្លាមៗ ។ កិច្ចពិភាក្សាទ្វេភាគី និងការកំណត់ពេលចុះហត្ថលេខាលើកិច្ចព្រមព្រៀងស្តីពីធនធានរ៉ែរបស់អ៊ុយក្រែន ត្រូវបានបរាជ័យ៕
ដោយ៖ ពេជ្រ
