ស្ថានភាពស្របច្បាប់នៃជនភៀសខ្លួនអ៊ុយក្រែន នៅក្នុងសហភាពអឺរ៉ុប អាចប្រឈមនឹងហានិភ័យ ដោយសារមិនមានផែនការច្បាស់លាស់ដែលអនុញ្ញាតឱ្យពួកគេស្នាក់នៅ បន្ទាប់ពីបញ្ចប់ជម្លោះ។ នេះបើតាមភ្នាក់ងារសារព័ត៌មាន Euractive ។
នៅក្នុងខែមីនា ឆ្នាំ ២០២២ សហភាពអឺរ៉ុប បានធ្វើឱ្យសកម្មនូវសេចក្តីណែនាំស្តីពីការការពារបណ្តោះអាសន្ន ដោយផ្តល់សិទ្ធិឱ្យជនជាតិអ៊ុយក្រែនរាប់លាននាក់ក្នុងការរស់នៅ និងធ្វើការនៅក្នុងប្លុកនេះ។
ទោះជាយ៉ាងណាក៏ដោយ នៅពេលដែលអរិភាពត្រូវបានបញ្ឈប់ ការណែនាំអាចផុតកំណត់ ដោយទុកឱ្យប្រទេសម្ចាស់ផ្ទះសម្រេចជោគវាសនានៃជនភៀសខ្លួនទាំងនោះថាតើត្រូវបន្តការគាំទ្រ សម្របសម្រួលការធ្វើសមាហរណកម្មដល់ពួកគេ ឬចាប់ផ្តើមកិច្ចខិតខំប្រឹងប្រែងធ្វើមាតុភូមិនិវត្តន៍។
បញ្ហានេះ មានភាពស្មុគស្មាញបន្ថែមទៀតដោយសារប្រវត្តិនៃការជជែកអំពីការធ្វើចំណាកស្រុកដ៏ចម្រូងចម្រាសរបស់សហភាពអឺរ៉ុប ដែលអាចរារាំងការសម្រេចចិត្តទាំងអស់ក្នុងប្លុក ដើម្បីពន្យារការការពារ។ ភាពមិនចុះសម្រុងគ្នាក្នុងចំណោមរដ្ឋជាសមាជិកអាចរារាំងវិធីសាស្រ្តបង្រួបបង្រួម ដោយទុកឱ្យគោលនយោបាយបែកបាក់។
បន្ថែមលើភាពមិនច្បាស់លាស់ ប្រទេសនីមួយៗបកស្រាយខុសៗគ្នាដោយផ្អែកលើច្បាប់របស់ប្រទេសរៀងៗខ្លួន ដែលនាំទៅដល់ការប្រព្រឹត្តមិនស្មើគ្នាចំពោះជនភៀសខ្លួនអ៊ុយក្រែន នៅទូទាំងសហភាពអឺរ៉ុប។ ការខ្វះការចុះសម្រុងគ្នានេះ ធ្វើឲ្យវាកាន់តែពិបាកក្នុងការអភិវឌ្ឍយុទ្ធសាស្ត្រយូរអង្វែង និងស្អិតរមួតសម្រាប់អនាគតរបស់ពួកគេ៕
ដោយ៖ ពេជ្រ
