ប្រធានាធិបតីសហរដ្ឋអាមេរិកលោក ដូណាល់ ត្រាំ កាលពីថ្ងៃអាទិត្យ បានគំរាមពីសកម្មភាពយោធាប្រឆាំងនឹងរដ្ឋាភិបាលកូឡុំប៊ី ដោយប្រាប់អ្នកយកព័ត៌មានថា ប្រតិបត្តិការបែបនេះ “ជាជម្រើសល្អសម្រាប់ខ្ញុំ”។
លោក ត្រាំ បានប្រាប់អ្នកយកព័ត៌មាននៅលើយន្តហោះថា ប្រទេសកូឡុំប៊ី ក៏មិនខុសពីវេណេស៊ុយអេឡាដែរ ដែលដឹកនាំដោយបុរសម្នាក់ ដែលចូលចិត្តផលិតកូកាអ៊ីន ហើយលក់វាទៅក្នុងទីផ្សារអាមេរិក។
ការអត្ថាធិប្បាយនេះ បានកើតឡើងបន្ទាប់ពីសហរដ្ឋអាមេរិក ចាប់ខ្លួនប្រធានាធិបតីវេណេស៊ុយអេឡា លោក នីកូឡាស ម៉ាឌូរ៉ូ ដោយជោគជ័យ នៅក្នុងការវាយឆ្មក់មួយ បញ្ជូនតាមយន្តហោះទៅកាន់ទីក្រុងញូវយ៉ក។
ទន្ទឹមនោះ លោក ត្រាំ បានបន្ថែមថា សហរដ្ឋអាមេរិក នឹងគ្រប់គ្រងប្រទេសវេណេស៊ុយអេឡា ហើយអាមេរិក នឹងបញ្ជូនក្រុមហ៊ុនសាងសង់ទៅជួសជុលហេដ្ឋារចនាសម្ព័ន្ធប្រេងដែលទ្រុឌទ្រោមយ៉ាងខ្លាំង បន្ទាប់ពីការវាយប្រហាររបស់ខ្លួន។
រដ្ឋាភិបាលបណ្តោះអាសន្នរបស់ប្រទេសវេណេស៊ុយអេឡា ដែលដឹកនាំដោយប្រធានាធិបតីស្តីទី លោកស្រី Delcy Rodriguez កាលពីថ្ងៃអាទិត្យ បានប្រកាសថា រដ្ឋាភិបាលរបស់ប្រទេសនេះនឹងនៅតែរួបរួមគ្នានៅពីក្រោយលោក ម៉ាឌូរ៉ូ។
លោកស្រី Rodriguez ដែលបានឡើងកាន់តំណែងជាមេដឹកនាំបណ្តោះអាសន្ន បន្ទាប់ពីការអនុម័តពីតុលាការកំពូលរបស់ប្រទេសវេណេស៊ុយអេឡា ក៏បាននិយាយផងដែរថា លោក ម៉ាឌូរ៉ូ នៅតែជាប្រធានាធិបតី ហើយជំទាស់ជាសាធារណៈចំពោះការអះអាងរបស់លោក ត្រាំ ដែលថាលោកស្រី មានឆន្ទៈក្នុងការធ្វើការជាមួយសហរដ្ឋអាមេរិក៕
ដោយ៖ ពេជ្រ
