អាជ្ញាធរម៉ិកស៊ិក បានរាយការណ៍ថា មនុស្សយ៉ាងហោចណាស់ ១៣ នាក់ស្លាប់ បន្ទាប់ពីរថភ្លើងអន្តរមហាសមុទ្រមួយគ្រឿងដែលដឹកមនុស្ស ២៥០ នាក់ ជួបគ្រោះថ្នាក់ធ្លាក់ផ្លូវនៅរដ្ឋ Oaxaca ភាគខាងត្បូង។
កងទ័ពជើងទឹកម៉ិកស៊ិក បានឱ្យដឹងថា រថភ្លើងដែលធ្លាក់ផ្លូវនៅជិតទីក្រុង Nizanda នោះមានអ្នកបើកចំនួន ៩ នាក់ និងអ្នកដំណើរ ២៤១ នាក់។
ក្នុងហេតុការណ៍នេះ មនុស្សចំនួន ១៣៩ នាក់ ត្រូវបានរាយការណ៍ថា រួចផុតពីគ្រោះថ្នាក់ ខណៈ ៩៨ នាក់រងរបួស និង ៣៦ នាក់ កំពុងសង្គ្រោះបន្ទាន់។
អភិបាលរដ្ឋ Oaxaca លោក Salomon Jara Cruz បានសម្តែងការចូលរួមរំលែកទុក្ខដល់ក្រុមគ្រួសារអ្នកស្លាប់នៅក្នុងគ្រោះថ្នាក់នេះ ហើយនិយាយថា អាជ្ញាធររដ្ឋ កំពុងសម្របសម្រួលជាមួយភ្នាក់ងារសហព័ន្ធ ដើម្បីជួយដល់អ្នករងគ្រោះក្នុងហេតុការណ៍នេះ។
លោកស្រី Ernestina Godoy Ramos អគ្គព្រះរាជអាជ្ញាម៉ិកស៊ិក អះអាងក្នុងការបង្ហោះសារនៅលើប្រព័ន្ធផ្សព្វផ្សាយសង្គមថា ការិយាល័យអគ្គព្រះរាជអាជ្ញាម៉ិកស៊ិក នឹងបើកការស៊ើបអង្កេតលើហេតុការណ៍នេះ។
គួរបញ្ជាក់ថា រថភ្លើងអន្តរមហាសមុទ្រ ដែលសម្ពោធដាក់ឲ្យដំណើរការនៅឆ្នាំ ២០២៣ ក្រោមការដឹកនាំរបស់អតីតប្រធានាធិបតីលោក Andres Manuel Lopez Obrador គឺជាផ្នែកមួយនៃគម្រោងច្រករបៀងអន្តរមហាសមុទ្រដ៏ទូលំទូលាយមួយ៕
ដោយ៖ ពេជ្រ
