អាជ្ញាធរ បាននិយាយថា មនុស្ស ៣នាក់បាត់បង់ជីវិតក្នុងការបំផ្ទុះគ្រាប់បែកអត្តឃាតដែលកំណត់គោលដៅលើទីស្នាក់ការកណ្តាលនៃកងកម្លាំងប៉ារ៉ាប៉ាគីស្ថានមួយកន្លែង នៅថ្ងៃចន្ទនេះ និងរបួសយ៉ាងហោចណាស់ ៥ នាក់។
ប៉ូលិស បានឱ្យដឹងថា ជនសង្ស័យបើកការបាញ់ប្រហារ ដើម្បីសម្រុកចូលទៅខាងក្នុងទីស្នាក់ការកណ្តាល ដើម្បីធ្វើសកម្មភាពបំផ្ទុះ។ ក្រោយធ្វើសកម្មភាពរួចរាល់ពួកគេ បានបំផ្ទុះខ្លួនឯងតាមក្រោយ។
យោងតាម លោក Javed Iqbal អនុប្រធានបញ្ជាការកងកម្លាំង បានបញ្ជាក់ថា យោធា ៣នាក់ ត្រូវបានសម្លាប់ក្នុងហេតុការណ៍នេះ។
មន្ត្រីជាន់ខ្ពស់ម្នាក់ អះអាងថា កម្លាំងអនុវត្តច្បាប់ រួមទាំងកងទ័ព និងប៉ូលិស កំពុងឡោមព័ទ្ធតំបន់នោះ ហើយកំពុងដោះស្រាយស្ថានការណ៍យ៉ាងប្រុងប្រយ័ត្ន ខណៈដែលសង្ស័យថាមានភេរវករមួយចំនួននៅក្នុងទីស្នាក់ការកណ្តាលនេះនៅឡើយ។
ទីស្នាក់ការកណ្តាលនៃកម្លាំងនេះ ស្ថិតនៅក្នុងតំបន់ដែលមានប្រជាជនរស់នៅយ៉ាងច្រើនកុះករនៃទីក្រុង Peshawar ដែលជារដ្ឋធានីនៃខេត្ត Khyber Pakhtunkhwa ។
ទោះជាយ៉ាងណា មកដល់ពេលនេះ នៅមិនទាន់មានក្រុមណាមួយចេញមុខមកទទួលខុសត្រូវនៅឡើយ ខណៈប៉ូលិស ក៏កំពុងកំណត់មូលហេតុនៅពីក្រោយការបំផ្ទុះនេះផងដែរ៕
ដោយ៖ ពេជ្រ
