ការប្រកួតជ្រើសរើសជើងឯកអាស៊ី លើកទី៦ ឆ្នាំ២០២៥ ដែលធ្វើឡើងនៅឯទីក្រុងកូឡាឡាំពួ ប្រទេសម៉ាឡេស៊ី បានបញ្ចប់ជាផ្លូវការហើយក្នុងនោះក្រុមជម្រើសជាតិកីឡាប៊ូល និងប៉េតង់កម្ពុជា ឈ្នះមេដាយសរុប ៣គ្រឿង មាស២ និងប្រាក់១ ។ នេះបើតាមរបាយការណ៍របស់លោកស្រី គីន សំណាង អគ្គលេខាធិការរងសហព័ន្ធកីឡាប៊ូល និងប៉េតង់កម្ពុជា។
សម្រាប់៣គ្រឿងដែកកម្ពុជា ដណ្ដើមបាន មាន៖ មេដាយមាស ទី១ រកបានដោយកីឡាករ នន់ រ៉ាវីន លើវិញ្ញាសា៖ យុវជន វាយយកពិន្ទុ ។ មេដាយមាស ទី២ រកបានដោយដោយកីឡាការិនី អ៊ុក ស្រីមុំ, អ៊ុន ស្រីយ៉ា, ហៀង វិជ្ជនី និង ពៅ ធីតា លើវិញ្ញាសា៖ នារី ៣នាក់ ទល់ ៣នាក់។ មេដាយប្រាក់ ១គ្រឿង រកបានដោយកីឡាករ ថោង ឈឿន, ហេង ថន, ពុធយ៉ុន ច័ន្ទដារ៉ា និង ស៊ីចាន់ តារា លើវិញ្ញាសា បុរស ៣នាក់ ទល់ ៣នាក់ ។
សូមជម្រាបថា ការប្រកួតជ្រើសរើសជើងឯកអាស៊ី លើកទី៦ នេះធ្វើឡើងចាប់ពីថ្ងៃទី៦ ដល់ ៩ ខែវិច្ឆិកា ឆ្នាំ២០២៥ នៅទីក្រុងកូឡាឡាំពួ ប្រទេសម៉ាឡេស៊ី ដោយមានអត្តពលិក ១៥ប្រទេសចូលរួម ក្នុងនោះក៏មានប្រតិភូ គ្រូបង្វឹក និងកីឡាករ-កីឡាការិនីកម្ពុជាចូលរួមចំនួន ១២នាក់ផងដែរ៕
