ប្រធានាធិបតីអាមេរិក លោក ដូណាល់ ត្រាំ ថ្លែងសុន្ទរកថាតាមអ៊ីនធឺណិតទៅកាន់វេទិកាសេដ្ឋកិច្ចពិភពលោកនៅទីក្រុង Davos ប្រទេសស្វីស កាលពីថ្ងៃព្រហស្បតិ៍។ អ្វីជាការកត់សម្គាល់នោះគឺលោកបានជំរុញឱ្យមេដឹកនាំអាជីវកម្មពិភពលោកផ្លាស់ប្តូរផលិតកម្មរបស់ខ្លួនទៅកាន់សហរដ្ឋអាមេរិក។
Trump បានលើកទ្បើងថា មកបង្កើតផលិតផលរបស់អ្នកនៅអាមេរិក ហើយយើងនឹងផ្តល់ឱ្យអ្នកនូវពន្ធទាបបំផុតរបស់ប្រទេសណាមួយនៅលើផែនដីនេះ។ យើងបាន និងកំពុងធ្វើឱ្យពួកគេធ្លាក់ចុះយ៉ាងខ្លាំង សូម្បីតែពីការកាត់ពន្ធរបស់ Trump ដើមក៏ដោយ។ លោក Trump បានបន្ថែមថា លោកក៏គ្រោងនឹងកាត់បន្ថយអត្រាពន្ធសាជីវកម្មនៅសហរដ្ឋអាមេរិកពី ២១ ភាគរយទៅ ១៥ ភាគរយ។
ទោះយ៉ាងណា Trump ក៏បានចេញការព្រមានដែរ ដោយលោកលើកទ្បើងថា “ប៉ុន្តែប្រសិនបើអ្នកមិនផលិតផលិតផលរបស់អ្នកនៅអាមេរិក ដែលជាបុព្វសិទ្ធិរបស់អ្នកទេ នោះអ្នកនឹងត្រូវបង់ពន្ធ”។
ទន្ទឹមនោះ លោក Trump ក៏បាននិយាយផ្តោតគោលដៅទៅលើប្រទេសផលិតប្រេងសំខាន់ៗផងដែរ ដោយបញ្ជាក់ថា លោកនឹងស្នើឱ្យអារ៉ាប៊ីសាអូឌីត និងអង្គការ OPEC កាត់បន្ថយថ្លៃដើមប្រេងផងដែរ។លោកថា ប្រសិនបើតម្លៃប្រេងធ្លាក់ចុះ លោកនឹងបញ្ជាឱ្យអ្នកបង្កើតគោលនយោបាយនៅធនាគារកណ្តាលអាមេរិកបញ្ចុះអត្រាការប្រាក់។បន្ថែមលើនោះលោកក៏បានអះអាង ថា តម្លៃប្រេងថោកវាអាចជួយនាំសង្គ្រាមនៅអ៊ុយក្រែនដល់ទីបញ្ចប់ភ្លាមៗ។
លោក Trump នៅបានបង្ហាញឆន្ទៈក្នុងការចូលរួមចរចាផ្ទាល់ជាមួយមេដឹកនាំរុស្ស៊ីដើម្បីបង្កើតកិច្ចព្រមព្រៀងសន្តិភាពផងដែរ។លោកបញ្ជាក់ថា លោកពិតជាចង់ជួបជាមួយប្រធានាធិបតីពូទីន ក្នុងពេលឆាប់ៗនេះ ដើម្បីបញ្ចប់សង្រ្គាម។ បញ្ហានោះវាមិនមែនមកពីទស្សនៈសេដ្ឋកិច្ច ឬអ្វីផ្សេងទៀតនោះទេ ប៉ុន្តែជាការពិតគឺវាមកពីទស្សនៈជីវិតរាប់លាននាក់កំពុងត្រូវបានបាត់បង់ដោយសារតែសង្រ្គាមនោះ។ ដូច្នេះយើងពិតជាមានឆន្ទៈបញ្ឈប់សង្គ្រាមបង្ហូរឈាមនោះ។
លោក Trump ក៏បានបង្ហាញទស្សនទាក់ទងនឹងការរំសាយអាវុធនុយក្លេអែរផងដែរ ដោយលោកថ្លែងការរំពឹងទុកថា “យើងចង់មើលថាតើយើងអាចរំសាយអាវុធនុយក្លេអ៊ែរបានទេ ប៉ុន្តែខ្ញុំគិតថា បញ្ហានោះវាអាចទៅរួច។ ហើយខ្ញុំក៏ចង់ប្រាប់អ្នកទាំងអស់គ្នាថា ប្រធានាធិបតីពូទីនចង់ធ្វើវា គាត់និងខ្ញុំចង់ធ្វើវាដូចគ្នា ហើយយើងក៏បានសន្ទនាគ្នាយ៉ាងល្អជាមួយប្រទេសចិន រួមទាំងប្រទេសដែលមានការពាក់ព័ន្ធ ហើយនោះវានឹងក្លាយជារឿងមិនគួរឲ្យជឿសម្រាប់ភពផែនដី។
លោក Trump បានបន្ថែមថា អាវុធនុយក្លេអែរវាទាមទារថវិកាយ៉ាងច្រើន ហើយថាមពលបំផ្លិចបំផ្លាញរបស់ពួកគេមានច្រើនលើសលប់ ដែលលោកយល់ថាវា “គួរឱ្យស្តាយណាស់ក្នុងការនិយាយពីវា៕
ដោយ៖ ពេជ្រ
