កាសែត Wall Street Journal រាយការណ៍ថា ឧត្តមសេនីយ៍ជាន់ខ្ពស់កូរ៉េខាងជើងម្នាក់បានរងរបួសនៅតំបន់ Kursk ភាគខាងលិចនៃប្រទេសរុស្ស៊ី ជាកន្លែងដែលកងកម្លាំងយោធាអ៊ុយក្រែនកំពុងធ្វើប្រតិបត្តិការវាយលុកឆ្លងព្រំដែន។
កាសែតអាមេរិកបានរាយការណ៍កាលពីថ្ងៃព្រហស្បតិ៍ថា នេះជាលើកទីមួយហើយដែលមន្ត្រីលោកខាងលិចបាននិយាយថាមន្ត្រីយោធាជាន់ខ្ពស់កូរ៉េខាងជើងម្នាក់បានរងរបួស។ រដ្ឋាភិបាលអាមេរិកកត់សម្គាល់ថា ទាហានកូរ៉េខាងជើងដែលទើបបញ្ជូនទៅរុស្ស៊ីកំពុងចូលរួមក្នុងប្រតិបត្តិការប្រយុទ្ធរបស់រុស្ស៊ីនៅ Kursk។
ប្រព័ន្ធផ្សព្វផ្សាយលោកខាងលិចរាយការណ៍ថា យោធាអ៊ុយក្រែនបានចាប់ផ្តើមប្រើប្រាស់មីស៊ីលរយៈចម្ងាយឆ្ងាយ រួមទាំងមីស៊ីលដែលផ្គត់ផ្គង់ដោយសហរដ្ឋអាមេរិកសម្រាប់ការវាយប្រហារនៅក្នុងទឹកដីរុស្ស៊ី។ របាយការណ៍បាននិយាយថា មីស៊ីល Storm Shadow ដែលផ្គត់ផ្គង់ដោយចក្រភពអង់គ្លេស ត្រូវបានបាញ់ចូលទៅក្នុងទីក្រុង Kursk កាលពីថ្ងៃពុធ។
ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅក្នុងសុន្ទរកថាមួយកាលពីថ្ងៃអង្គារថាចំនួនទាហានកូរ៉េខាងជើងដែលដាក់ពង្រាយនៅភាគខាងលិចប្រទេសរុស្ស៊ី អាចកើនឡើងដល់ 100,000 នាក់។
ដោយ៖ ពេជ្រ
