ប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump បានថ្លែងកាលពីម្សិលមិញថា កិច្ចប្រជុំមួយកំពុងត្រូវបានបង្កើតឡើងរវាងលោក និងប្រធានាធិបតីរុស្ស៊ី លោក Vladimir Putin ហើយរំពឹងថា យើងនឹងជួបគ្នាឆាប់ៗនេះ។
លោក Trump បានថ្លែងឲ្យដឹងបែបនេះមុនពេលនៃកិច្ចប្រជុំជាមួយអភិបាលនៃគណបក្សសាធារណរដ្ឋនៅក្នុងក្លឹបវាយកូនហ្គោល Mar-a-Lago ក្នុងទីក្រុង Palm Beach រដ្ឋ Florida ។ លោកបញ្ជាក់ច្បាស់ថា “ពូ ទីនចង់ជួបជាមួយលោក …ហើយយើងកំពុងរៀបចំឲ្យមានជំនួបនោះ”។ យ៉ាងណាក៏ដោយ លោក Trump មិនបានបញ្ជាក់នៅទ្បើយទេថា តើការប្រជុំនឹងប្រព្រឹត្តទៅនៅពេលណា ហើយនៅទីណានោះទេ។
លោក Trump នឹងចូលកាន់តំណែងនៅថ្ងៃទី ២០ ខែមករាឆ្នាំ២០២៥នេះ ហើយលោកក៏បានរិះគន់ការផ្តល់ជំនួយឥតលក្ខខណ្ឌរបស់ប្រធានាធិបតី Joe Biden ទៅឲ្យទីក្រុង Kiev ហើយក្នុងអំឡុងពេលបោះឆ្នោតគាត់ក៏បានប្តេជ្ញាថានឹងបង្ខំរុស្ស៊ីនិងអ៊ុយក្រែនឱ្យចាប់ផ្តើមការចរចាឡើងវិញយ៉ាងឆាប់រហ័សដើម្បីឈានទៅការបញ្ចប់សង្រ្គាម។
លោក Trump ក៏បានពិពណ៌នាផងដែរអំពីមេដឹកនាំអ៊ុយក្រែនលោក Vladimir Zelensky ថាជា “អ្នកលក់ដ៏អស្ចារ្យបំផុតនៅលើផែនដីនេះ”។ ការនិយាយបែបនោះគឺសំដៅទៅលើលោក Zelenskyដែលតឺងតែស្រែកសុំឱ្យប្រទេសលោកខាងលិចផ្តល់ជំនួយផ្នែកយោធា និងហិរញ្ញវត្ថុបន្ថែមជាបន្តបន្ទាប់។
ទោះបីជាលោក Trump មិនបានបង្ហាញពីផែនទីបង្ហាញផ្លូវច្បាស់លាស់សម្រាប់សន្តិភាពក៏ដោយ តាមរបាយការណ៍ប្រព័ន្ធផ្សព្វផ្សាយបានអះអាងថាក្រុមរបស់គាត់កំពុងពិចារណាលើការបង្កកជម្លោះនៅតាមខ្សែបន្ទាត់ខាងមុខបច្ចុប្បន្ន ខណដែលផែនការនោះត្រូវបានរារាំងដោយទីក្រុងមូស្គូ។
ថ្លែងទៅកាន់អ្នកសារព័ត៌មានកាលពីថ្ងៃព្រហស្បតិ៍ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ទីក្រុងម៉ូស្គូមិនទាន់ទទួលសំណើសម្រាប់កិច្ចប្រជុំរវាង Trump-Putin នោះនៅទ្បើយទេ។ ប៉ុន្តែលោក Peskov បាននិយាយថា សមហេតុផលណាស់ក្នុងការរង់ចាំរហូតដល់ Trump ចូលកាន់តំណែងសិន។
បេសកជនអ៊ុយក្រែនដែលចូលជួបលោក Trump កាលពីថ្មីៗនេះ គឺលោក Keith Kellogg បានបង្ហាញក្តីសង្ឃឹមថា លោកអាចបញ្ចប់កិច្ចព្រមព្រៀងរវាងរុស្ស៊ី និងអ៊ុយក្រែនក្នុងរយៈពេល ១០០ ថ្ងៃបន្ទាប់ពីថ្ងៃសម្ពោធចូលកាន់តំណែងប្រធានាធិបតី។ លោកក៏បានរិះគន់លោក Biden ដែលមិនបានពិភាក្សាជាមួយលោក Putin ចាប់តាំងពីឆ្នាំ ២០២២នៅពេលដែលរុស្ស៊ីចាប់ផ្តើមប្រតិបត្តិការយោធារបស់ខ្លួននៅក្នុងប្រទេសអ៊ុយក្រែន៕
ដោយ៖ ពេជ្រ
