ប្រព័ន្ធផ្សព្វផ្សាយក្នុងស្រុកបានឲ្យដឹងថា រដ្ឋាភិបាលអ៊ីស្រាអែលកំពុងពិចារណាបញ្ជាកងទ័ពឱ្យកាន់កាប់ទាំស្រុងនូវទីក្រុងហ្គាហ្សា ។
តាមប៉ុស្តិ៍ព័ត៌មានលេខ ១៤ របស់អ៊ីស្រាអែល បានឲ្យដឹងដែរថា ការផ្លាស់ប្តូរជំហរនេះកើតឡើងចំពេលមានការជាប់គាំងក្នុងការចរចាដោយប្រយោលក្នុងគោលបំណងឈានដល់បទឈប់បាញ់ Gaza និងកិច្ចព្រមព្រៀងដោះដូរអ្នកទោសជាមួយប៉ាឡេស្ទីន។ យោងតាមប្រព័ន្ធផ្សព្វផ្សាយ រដ្ឋាភិបាលរបស់នាយករដ្ឋមន្ត្រីលោក Benjamin Netanyahu បង្ហាញការពេញចិត្តជាមួយនឹងលទ្ធផលនៃយុទ្ធនាការយោធារបស់ខ្លួននៅភាគខាងជើងហ្គាហ្សា។
អ៊ីស្រាអែលបានបន្តការវាយលុកទ្រង់ទ្រាយធំនៅភាគខាងជើងតំបន់ហ្កាហ្សាចាប់តាំងពីថ្ងៃទី ៥ ខែតុលា ដោយត្រូវបានគេចោទថាដើម្បីរារាំងក្រុមហាម៉ាសដែលតស៊ូប៉ាឡេស្ទីនមិនឲ្យមានការរៀបចំក្រុមនេះឡើងវិញ។ យ៉ាងណាក៏ដោយ ប៉ាឡេស្ទីនបានចោទអ៊ីស្រាអែលថា មានបំណងកាន់កាប់តំបន់នោះ និងបង្ខំឲ្យអ្នកស្រុកភៀសខ្លួន។ បណ្តាញព័ត៌មានដដែលបានឲ្យដឹងទៀតថា មេដឹកនាំនយោបាយកំពុងពិចារណាក្នុងការចេញបញ្ជាដល់កងទ័ពអ៊ីស្រាអែលឲ្យឆ្ពោះទៅទិសខាងត្បូងនិងកាន់កាប់ក្រុងហ្គាហ្សាទាំងស្រុងក្នុងពេលដ៏ខ្លីខាងមុខ។
គួររំលឹកថា កិច្ចខិតខំប្រឹងប្រែងសម្រុះសម្រួលដែលដឹកនាំដោយសហរដ្ឋអាមេរិក អេហ្ស៊ីប និងកាតា ដើម្បីឈានដល់បទឈប់បាញ់នៅហ្គាហ្សារហូតមកដល់ពេលនេះបានបរាជ័យដោយសារតែការបដិសេធរបស់លោក Netanyahu ក្នុងការបញ្ឈប់សង្គ្រាម។
កងទ័ពអ៊ីស្រាអែលបានបន្តសង្រ្គាមប្រល័យពូជសាសន៍លើតំបន់ហ្គាហ្សា ដែលបានសម្លាប់ជនរងគ្រោះជាង 45,500 នាក់ ដែលភាគច្រើនជាស្ត្រី និងកុមារ ចាប់តាំងពីការវាយប្រហាររបស់ពួកហាម៉ាសកាលពីថ្ងៃទី 7 ខែតុលា ឆ្នាំ 2023 ទោះបីជាមានដំណោះស្រាយក្រុមប្រឹក្សាសន្តិសុខអង្គការសហប្រជាជាតិអំពាវនាវឱ្យមានការឈប់បាញ់ជាបន្ទាន់ក៏ដោយ។
កាលពីខែវិច្ឆិកា តុលាការឧក្រិដ្ឋកម្មអន្តរជាតិបានចេញដីកាចាប់ខ្លួនលោក Netanyahu និងអតីតរដ្ឋមន្ត្រីការពារជាតិរបស់គាត់ លោក Yoav Gallant ពីបទឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិនៅហ្គាហ្សា។ អ៊ីស្រាអែលក៏ប្រឈមនឹងសំណុំរឿងប្រល័យពូជសាសន៍នៅតុលាការយុត្តិធម៌អន្តរជាតិសម្រាប់សង្រ្គាមនៅក្នុងតំបន់ព័ទ្ធជុំវិញ៕
ដោយ៖ ពេជ្រ
