មន្ត្រីការទូតជាន់ខ្ពស់សហរដ្ឋអាមេរិក ត្រៀមធ្វើដំណើរទស្សនកិច្ចទៅកាន់ទីក្រុងដាម៉ាសប្រទេសស៊ីរី ក្នុងពេលឆាប់ៗខាងមុខនេះ។ នេះបើយោងតាមវិបផតថល Axios បានរាយការណ៍ កាលពីថ្ងៃព្រហស្បតិ៍ ដោយដកស្រង់សម្តីមន្ត្រីអាមេរិក ២ នាក់មិនបញ្ចេញឈ្មោះ។
របាយការណ៍មិនផ្តល់ព័ត៌មានលម្អិតបន្ថែមទៀតនៃដំណើរទស្សនកិច្ចនេះទេ ខណក្រសួងការបរទេសអាមេរិក ក៏មិនទាន់ឆ្លើយតបសម្រាប់ការធ្វើអត្ថាធិប្បាយនៅឡើយដែរ ។
ទន្ទឹមនោះ រដ្ឋមន្ត្រីការបរទេសអាមេរិក លោក Antony Blinken បានប្រាប់ទូរទស្សន៍ Bloomberg ថា សហរដ្ឋអាមេរិក កំពុងសម្លឹងមើលលទ្ធភាពបញ្ជូនមន្ត្រីទៅដីស៊ីរី ព្រោះវាមានសារៈសំខាន់ ដើម្បីឱ្យមានការទំនាក់ទំនងដោយផ្ទាល់ ជាមួយមេដឹកនាំថ្មីរបស់ប្រទេសនេះ ដោយបន្ថែមថា ជម្រើសនេះនឹងត្រូវថ្លឹងថ្លែងនៅថ្ងៃខាងមុខ។
គួរបញ្ជាក់ថា ទីក្រុងវ៉ាស៊ីនតោន កំពុងពិនិត្យមើលលទ្ធភាពនៃការដកឈ្មោះភេរវកររបស់ខ្លួនចេញសម្រាប់ក្រុមប្រដាប់អាវុធ Hay’at Tahrir al-Sham (HTS ដែលខុសច្បាប់នៅក្នុងប្រទេសរុស្ស៊ី) ដែលដណ្តើមអំណាចដោយជោគជ័យនៅក្នុងប្រទេសស៊ីរី ៕
ដោយ៖ ពេជ្រ
