រដ្ឋបាលចំណីអាហារ និងឱសថសហរដ្ឋអាមេរិក (FDA) បានជូនដំណឹងពាក់ព័ន្ធនឹងការរកឃើញមេរោគ norovirus នៅលើអយស្ទ័រ ដែលនាំចូលពីកាណាដា កាលពីដើមខែនេះ ហើយចែកចាយទៅកាន់រដ្ឋយ៉ាងហោចណាស់ ១៥ ។
ការព្រួយបារម្ភដែលលើកឡើងដោយក្រុមហ៊ុន S&M Shellfish មានមូលដ្ឋាននៅទីក្រុង San Francisco បង្ហាញពីការចម្លងរោគ norovirus ពីអយស្ទ័រទៅមនុស្ស។
បន្ទាប់ពីការរកឃើញនេះ FDA កំពុងណែនាំដល់ភោជនីយដ្ឋាន និងហាងលក់អាហារ ឲ្យផ្អាកលក់អយស្ទ័រ ហើយបើអាចបោះចោលជាបន្ទាន់។
រោគសញ្ញានៃមេរោគ norovirus រួមមាន រាគ ក្អួត ចង្អោរ និងឈឺក្រពះ នេះបើយោងតាម FDA ។ រោគសញ្ញាជាធម្មតាវិវត្តន៍ពី ១២ ទៅ ៤៨ ម៉ោងបន្ទាប់ពីការប៉ះពាល់នឹងវីរុស ហើយអ្នកជំងឺភាគច្រើនជាសះស្បើយយ៉ាងពេញលេញក្នុងរយៈពេល ១ ទៅ ៣ ថ្ងៃ។ រោគសញ្ញា ក៏អាចរួមមានគ្រុនក្តៅ ឈឺក្បាល និងឈឺខ្លួនផងដែរ ។
ជាមួយគ្នានោះ មន្ត្រី បានព្រមានថា អ្នកជំងឺដែលមានរោគសញ្ញា ក៏អាចស្ថិតក្នុងគ្រោះថ្នាក់នៃការខ្សោះជាតិទឹកដែលអាចនាំអោយមានរោគសញ្ញាផ្សេងៗ និងផលវិបាកដល់សុខភាព។
យោងតាម CDC បានបញ្ជាក់ថា ត្រី ខ្យង ក៏ជាក្រុមអាហារមួយក្នុងចំណោមក្រុមអាហារជាច្រើនដែលជាធម្មតាអាចរងផលប៉ះពាល់នៃមេរោគ norovirus នេះ រួមជាមួយផ្លែឈើស្រស់ៗក៏ងាយរងគ្រោះផងដែរ។
CDC បានបន្ថែមថា norovirus គឺជាមេរោគដំបូងដែលមានផ្ទុកក្នុងចំណីអាហារ ហើយរកឃើញនៅសហរដ្ឋអាមេរិក ផងដែរ។
គួរបញ្ជាក់ថា អយស្ទ័រ ដែលរងផលប៉ះពាល់នៃមេរោគ ត្រូវបានអាជ្ញាធររកឃើញ និងប្រមូលបោះចោល នៅចន្លោះថ្ងៃទី ១ ខែធ្នូ ដល់ថ្ងៃទី ៩ ខែធ្នូ ពីតំបន់ដាំដុះ British Columbia។ យោងតាមមន្ត្រី អយស្ទ័រ ត្រូវបានលក់ក្រោមម៉ាកយីហោ Fanny Bay, Buckley Bay និង Royal Miyagi ៕
ដោយ៖ ពេជ្រ
