ហាម៉ាស និងស្ថាប័នរដ្ឋបាលដែលខ្លួនបានបង្កើតឡើងកំពុងពង្រឹងការគ្រប់គ្រងលើតំបន់ហ្គាហ្សា បន្ទាប់ពីបទឈប់បាញ់ជាមួយកងទ័ពអ៊ីស្រាអែល។
យោងតាមទីភ្នាក់ងារ ស្ថាប័នរដ្ឋបាល និងអនុវត្តច្បាប់ដែលគ្រប់គ្រងដោយហាម៉ាស បានឱ្យដឹងថា ក្រុមនេះកំពុងយកពន្ធថ្មីលើទំនិញនាំចូលឯកជន រួមទាំងប្រេងឥន្ធនៈ និងបារី ក្នុងគោលបំណងបំពេញកញ្ចប់ចំណាយរបស់ខ្លួន។
ជាមួយគ្នានេះ ក៏មានការគ្រប់គ្រងតម្លៃលើអាហារ និងទំនិញផ្សេងទៀតដែលលក់នៅក្នុងហាង និងទីផ្សារ ដោយពិន័យអាជីវករដែលមិនគោរពតាម។
យោងតាមពាណិជ្ជករប៉ាឡេស្ទីន បញ្ជាក់ថា ហាម៉ាស កំពុងស្វែងរកការគ្រប់គ្រងទាំងស្រុង នៅក្នុងតំបន់ ដោយរៀបចំកន្លែងត្រួតពិនិត្យតាមបណ្តោយផ្លូវ និងបញ្ឈប់រថយន្តដឹកទំនិញសម្រាប់ការត្រួតពិនិត្យ។
ទោះជាយ៉ាងណាក៏ដោយ ពាណិជ្ជករក្នុងស្រុក និយាយថា តម្លៃដែលក្រុមកំណត់នៅតែខ្ពស់។ ទោះជាយ៉ាងណា អ្នកនាំពាក្យរបស់រដ្ឋបាលដែលគ្រប់គ្រងដោយហាម៉ាស លោក Ismail al-Thawabta បានបដិសេធរបាយការណ៍អំពីការដាក់ពន្ធថ្មីនៅក្នុងតំបន់ហ្គាហ្សា ហើយថាក្រុមនៅទ្រឹងនៅឡើយ បន្ទាប់ពីបទឈប់បាញ់។
កាលពីថ្ងៃទី ២៩ ខែកញ្ញា សេតវិមាន បានចេញផ្សាយផែនការដ៏ទូលំទូលាយរបស់លោកប្រធានាធិបតីអាមេរិក ដូណាល់ ត្រាំ ដើម្បីដោះស្រាយស្ថានការណ៍នៅតំបន់ហ្គាហ្សា។ ផែនការដែលមាន ២០ ចំណុចនេះ រួមមាន ការបង្កើតរដ្ឋបាលខាងក្រៅបណ្តោះអាសន្ននៅក្នុងតំបន់ប៉ាឡេស្ទីន និងការដាក់ពង្រាយកងកម្លាំងស្ថិរភាពអន្តរជាតិនៅទីនោះ។ នៅថ្ងៃទី ៩ ខែតុលា អ៊ីស្រាអែល និងហាម៉ាស បានព្រមព្រៀងគ្នាលើការអនុវត្តដំណាក់កាលដំបូងនៃផែនការសន្តិភាពរបស់លោក ត្រាំ ហើយកិច្ចព្រមព្រៀងឈប់បាញ់បានចូលជាធរមាននៅថ្ងៃទី ១០ ខែតុលា៕
ដោយ៖ ពេជ្រ
