បន្ទាយមានជ័យ៖ អនុប្រធានទី២ ព្រឹទ្ធសភា ឯកឧត្តម ធន់ វឌ្ឍនា បានដឹកនាំគណៈប្រតិភូព្រឹទ្ធសភា និងតំណាងសភាពាណិជ្ជកម្មបរទេសចុះស្វែងយល់ដោយផ្ទាល់អំពីភូមិសាស្រ្ដនិងស្ថានភាពភូមិជោគជ័យ (រួមទាំងចំណុចដែលទាហានថៃបានរាយបន្លាលួសបន្ថែម ហើយត្រូវពលរដ្ឋតទល់អោយរុះរើចេញវិញកាលពីថ្ងៃ២៥ខែសីហា ) និងភូមិព្រៃចាន់ដែលទាហានថៃបានបណ្ដេញប្រជាជនកម្ពុជាចំនួន១២គ្រួសារពីផ្ទះ និងបានព័ទ្ធបន្លាលួសជុំវិញភូមិស្ថាន។
គួររំលឹកថា កាលពីថ្ងៃទី២៩ ខែសីហា ឆ្នាំ២០២៥ ឯកឧត្តម ធន់ វឌ្ឍនា អនុប្រធានទី២ព្រឹទ្ធសភា បានដឹកនាំគណៈប្រតិភូព្រឹទ្ធសភា និងតំណាងសភាពាណិជ្ជកម្មបរទេសមួយចំនួនរួមមានសភាពាណិជ្ជកម្មអាម៉េរិក អឺរ៉ុប អូស្រ្តាលី ឥណ្ឌា ហ្វ៊ីលីពីន សិង្ហបុរី និងក្រុមហ៊ុនឯកជនមួយចំនួនទៀត ចុះស្វែងយល់ដោយផ្ទាល់នូវទីតាំងខាងលើ។ គណៈប្រតិភូត្រូវបានទទួលស្វាគមន៍ពីឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ និង ឯកឧត្តម ឌិត ទីណា រដ្ឋមន្រ្ដីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានជួយខេត្តបន្ទាយមានជ័យ ក្នុងនោះ ក៏រួមមានអភិបាលរងខេត្ត មេបញ្ជាការ មេបញ្ជាការរង ស្នងការ ស្នងការរងនៃកងកម្លាំង អភិបាលស្រុកអូរជ្រៅ និងអ្នកពាក់ព័ន្ធ ផងដែរ ៕
