ភ្ញៀវទេសចរ ២ នាក់ស្លាប់ នៅលើកោះបាលីប្រទេសឥណ្ឌូនេស៊ី បន្ទាប់ពីដើមឈើដ៏ធំមួយក្នុងដែនជម្រកសត្វស្វាពិសិដ្ឋ បានបាក់រលំ កាលពីថ្ងៃអង្គារ ។
ហេតុការណ៍នេះ បានកើតឡើងកាលពីវេលាម៉ោង ១២ និង ១០ នាទីយប់ ម៉ោងក្នុងស្រុក ។
តាមការគ្រប់គ្រងនៃតំបន់ទេសចរណ៍ដ៏ពេញនិយម ឧបទ្ទវហេតុនេះបណ្តាលមកពី «ខ្យល់កន្រ្តាក់មួយរំពេច និងខ្លាំង»។ អ្នកទេសចរម្នាក់ទៀតរងរបួស។
សារព័ត៌មាន Jakarta Globe បានរាយការណ៍ថា អ្នកទេសចរ ២ នាក់ដែលស្លាប់នោះ គឺជាស្ត្រីទាំង ២ នាក់ ដោយមានឈ្មោះ F Justine Christine អាយុ ៣២ឆ្នាំ មកពីប្រទេសបារាំង និងម្នាក់ទៀតឈ្មោះ Kim Hyoeun អាយុ ៤២ ឆ្នាំមកពីកូរ៉េខាងត្បូង ខណម្នាក់ទៀតរងរបួសធ្ងន់ ។
ដែនជម្រកសត្វស្វាពិសិដ្ឋ គឺជាតំបន់អភិរក្សធម្មជាតិ និងប្រាសាទ នៅក្នុងទីក្រុង Ubud នៅតំបន់ខ្ពង់រាបនៃកោះបាលី ប្រទេសឥណ្ឌូនេស៊ី ។
គួរបញ្ជាក់ថា ប្រជាជនបាលីក្នុងតំបន់ចាត់ទុកថាពិសិដ្ឋ វាជាជម្រករបស់សត្វស្វាជាង ១,២៦០ ក្បាល ក្រោយពីមានឧបទ្ទវហេតុនេះ ទីជម្រក បានប្រកាសបិទបណ្ដោះអាសន្ន៕
ដោយ៖ ពេជ្រ
