បណ្តាញទូរទស្សន៍ Al Arabiya បានរាយការណ៍ដោយដកស្រង់ប្រភពរបស់ខ្លួនថា ហាម៉ាសបានអះអាងថា ខ្លួនត្រៀមខ្លួនរួចជាស្រេចហើយ ក្នុងការដកកងកម្លាំងចេញពីតំបន់ហ្គាហ្សាស្ទ្រីប ប្រសិនបើអ៊ីស្រាអែលដកកងទ័ពរបស់ខ្លួនទៅកាន់កន្លែងដែលបានព្រមព្រៀងគ្នា។
យោងតាមប្រភពព័ត៌មាន គណៈប្រតិភូហាម៉ាស់នៅទីក្រុងគែរបានប្រគល់សំណើរបស់ខ្លួនស្តីពីកិច្ចព្រមព្រៀងបទឈប់បាញ់នៅតំបន់ហ្គាហ្សាដ៏មានសក្តានុពលដល់ក្រុមអ្នកសម្រុះសម្រួលអេហ្ស៊ីប។ ប្រភពបាននិយាយថា ក្រុមហាម៉ាស់បានសម្តែងការត្រៀមខ្លួនដើម្បីដកកងកម្លាំងរបស់ខ្លួនជាថ្នូរនឹងការដកទ័ពរបស់អ៊ីស្រាអែលទៅកាន់មូលដ្ឋានដែលបានព្រមព្រៀងគ្នា ហើយបានរំលឹកឡើងវិញនូវការប្តេជ្ញាចិត្តរបស់ខ្លួនក្នុងការរក្សាអាយុជីវិតចំណាប់ខ្មាំងផងដែរ។ ទន្ទឹមនោះក្រុមហាម៉ាស់ ក៏ទាមទារកិច្ចព្រមព្រៀងជាលាយលក្ខណ៍អក្សរជាមួយអ៊ីស្រាអែល ដែលនឹងផ្តល់ការធានាអន្តរជាតិថាអ៊ីស្រាអែលនឹងបោះបង់ផែនការកាន់កាប់តំបន់ហ្គាហ្សារបស់ខ្លួន ហើយនឹងមិនបន្តកើតមានអរិភាពឡើងវិញនោះទ្បើយ។
ប្រភពដដែលបានឲ្យដឹងថា អេហ្ស៊ីបកំពុងធ្វើការលើផែនទីបង្ហាញផ្លូវសម្រាប់កិច្ចព្រមព្រៀងគ្រប់ជ្រុងជ្រោយលើតំបន់ហ្កាហ្សាដែលនឹងត្រូវអនុវត្តនៅចុងខែសីហានេះ។
ទូរទស្សន៍ Al-Qahera al-Ekhbariya របស់ប្រទេសអេហ្ស៊ីប បានរាយការណ៍កាលពីថ្ងៃពុធ ដោយដកស្រង់ប្រភពមួយថា គណៈប្រតិភូហាម៉ាសបានជួបប្រជុំគ្នានៅទីក្រុងគែរ ជាមួយប្រធានចារកម្មអេហ្ស៊ីប Hassan Rashind ដើម្បីបង្ហាញអំពីចេតនារបស់ខ្លួនក្នុងការបន្តកិច្ចចរចាបទឈប់បាញ់ឱ្យបានឆាប់តាមដែលអាចធ្វើទៅបាន។
យោងតាមប្រភពបានឱ្យដឹងទៀតថា ការពិគ្រោះយោបល់នៅទីក្រុងគែរកំពុងផ្តោតលើមធ្យោបាយសម្រាប់ការឈានដល់កិច្ចព្រមព្រៀងបទឈប់បាញ់រយៈពេល ៦០ ថ្ងៃ៕
ដោយ៖ ពេជ្រ
