លោកគ្រូ Pep Muñoz បាននិយាយថា “ខ្ញុំពិតជាសប្បាយចិត្តខ្លាំងណាស់ ដែលក្លឹបព្រះខ័នរាជស្វាយរៀង ឡើងទៅកាន់វគ្គផ្តាច់ព្រ័ត្រ ពិតជាអស្ចារ្យខ្លាំងណាស់សម្រាប់ក្លឹប សម្រាប់កីឡាករ បុគ្គលិក ក្រុមការងារ សម្រាប់អ្នកគាំទ្រក្លឹបព្រះខ័នរាជស្វាយរៀង សម្រាប់បងប្អូនអ្នកខេត្តស្វាយរៀង ក៏ដូចជាអ្នកគាំទ្របាល់ទាត់កម្ពុជាទាំងមូល ។
គ្រូបង្វឹកសញ្ជាតិអេស្ប៉ាញរូបនេះបាននបន្តថា យើងពិតជាសប្បាយចិត្តរីករាយមែនទែនជាមួយលទ្ធផលមួយនេះ ឥឡូវនេះយើងលេងមួយប្រកួតគិតមួយប្រកួត ប៉ុន្តែជាក់ស្តែងយើងនិងព្យាយាមដល់ការប្រកួតវគ្គចុងក្រោយ ហើយយើងនឹងបង្ហាញគុណភាពកីឡាកររបស់យើងទាំងអស់ក្នុងពានរង្វាន់ក្នុងស្រុក និងពានរង្វាន់អន្តរជាតិ ខ្ញុំសូមថ្លែងអំណរគុណដល់អ្នកគាំទ្រក្លឹបព្រះខ័នរាជស្វាយរៀង ដែលធ្វើដំណើរមកគាំទ្រដល់ឥណ្ឌូណេស៊ីផ្ទាល់ ហើយអ្នកគាំទ្រដែលគាំទ្រនៅប្រទេសកម្ពុជា យើងលេងដើម្បីឱ្យពួកគាត់សប្បាយចិត្ត”។
សូមជម្រាបថា មុនឡើងមកដល់វគ្គផ្ដាច់ព្រ័ត្រពានរង្វាន់ AFC Challenge League ២០២៤-២៥ ក្រុមតំណាងកម្ពុជា ព្រះខ័នរាជស្វាយរៀង បានឈ្នះលើក្រុមតំណាងឥណ្ឌូនេស៊ី Madura United ក្នុងវគ្គ៤ក្រុមចុងក្រោយ សរុបទាំង២ជើងដោយលទ្ធផល៦-៣។ ចំណែកការប្រកួតវគ្គផ្ដាច់ព្រ័ត្រព្រះខ័នរាជស្វាយរៀង ត្រូវប៉ះក្រុម FK Arkadag នាថ្ងៃទី១០ ខែឧសភា ឆ្នាំ២០២៥ នៅពហុកីឡដ្ឋានមរតកតេជោ ខណៈ ការប្រកួតធ្វើឡើងតែមួយជើងប៉ុណ្ណោះ៕
