ទូរទស្សន៍ Al Masirah ដែលគ្រប់គ្រងដោយ Houthi បានរាយការណ៍ថា យ៉ាងហោចណាស់មនុស្ស ២ នាក់ស្លាប់ និង ៤២នាក់រងរបួស បន្ទាប់ពីការវាយប្រហារតាមអាកាសរបស់អ៊ីស្រាអែល ទៅលើរោងចក្រស៊ីម៉ងត៍ Bajel ក្នុងខេត្ត Hodeida នៅភាគខាងលិចប្រទេសយេម៉ែន។
យោងតាមប្រភព បានបន្ថែមថា អ៊ីស្រាអែល ធ្វើការវាយប្រហារតាមអាកាសជាបន្តបន្ទាប់ទៅលើគោលដៅក្រុម Houthi នៅក្នុងខេត្ត Hodeida នៃប្រទេសយេម៉ែន រួមទាំងកំពង់ផែ Hodeida និងរោងចក្រស៊ីម៉ងត៍ Bajel កាលពីល្ងាចថ្ងៃចន្ទ។
ការវាយប្រហារនេះ កើតឡើងបន្ទាប់ពីក្រុម Houthi បាញ់មីស៊ីលសំដៅទៅជិតអាកាសយានដ្ឋានអន្តរជាតិ Ben Gurion នៃទីក្រុង Tel Aviv កាលពីថ្ងៃទី ៤ ខែឧសភា បណ្តាលឲ្យមនុស្ស ៤នាក់រងរបួស។
ទោះជាយ៉ាងណា ក្រុម Houthis បានអះអាងទទួលខុសត្រូវចំពោះការវាយប្រហារដោយមីស៊ីលនេះ។ យោងតាមអ្នកនាំពាក្យរបស់ Houthi លោក Yahya Saree អះអាងថា អាកាសយានដ្ឋានត្រូវបានវាយប្រហារដោយប្រើមីស៊ីលផ្លោងដែលមានល្បឿនលឿន។ ក្រោយការវាយប្រហារនេះ លោកនាយករដ្ឋមន្ត្រីអ៊ីស្រាអែល Benjamin Netanyahu បានព្រមានអំពីវិធានការសងសឹកភ្លាមៗ ៕
ដោយ៖ ពេជ្រ
