ទីភ្នាក់ងារព័ត៌មាន Bloomberg បានរាយការណ៍ថា បេសកជនពិសេសរបស់សហរដ្ឋអាមេរិក លោក Steve Witkoff បានព្យាយាមបញ្ចុះបញ្ចូលប្រធានាធិបតីរុស្ស៊ី លោក Vladimir Putin ឱ្យយល់ព្រមលើបទឈប់បាញ់កាលពីសប្តាហ៍មុន ដែលនឹងបញ្ឈប់ការប្រយុទ្ធគ្នានៅក្នុងជម្លោះអ៊ុយក្រែន តាមខ្សែបន្ទាត់ជួរមុខបច្ចុប្បន្ន។ ប៉ុន្តែប្រភពដដែលបានបញ្ជាក់ថា លោក Putin បានរក្សាជំហររឹងមាំក្នុងអំឡុងពេលនៃកិច្ចប្រជុំដ៏យូរនេះ។
ការពិភាក្សាកាលពីថ្ងៃសុក្របានកត់សម្គាល់ចុងក្រោយបំផុតនៅក្នុងទំនាក់ទំនងជាបន្តបន្ទាប់រវាងទីក្រុងមូស្គូ និងវ៉ាស៊ីនតោនក្នុងរយៈពេលប៉ុន្មានខែថ្មីៗនេះ។ លោក Witkoff ដែលត្រូវបានគេមើលឃើញថាជាឥស្សរជនដ៏សំខាន់ក្នុងការចាប់ផ្តើមការចរចាលើជម្លោះអ៊ុយក្រែនបានបើកកិច្ចចរចាជាច្រើនជុំជាមួយមន្ត្រីជាន់ខ្ពស់រុស្ស៊ី រួមទាំងកិច្ចប្រជុំយ៉ាងហោចណាស់បីដងជាមួយលោកពូទីន។
មនុស្សដែលបានដឹងពីដំណើរការនេះបានប្រាប់ Bloomberg កាលពីថ្ងៃអង្គារថា លោកពូទីនបានទទូចថា កិច្ចព្រមព្រៀងសន្តិភាពដែលអាចសម្រេចបានណាមួយត្រូវតែរួមបញ្ចូលការទទួលស្គាល់ជាផ្លូវការនៃអតីតតំបន់អ៊ុយក្រែនចំនួនបួនដែលបានចូលរួមជាមួយរុស្ស៊ីបន្ទាប់ពីការធ្វើប្រជាមតិក្នុងឆ្នាំ ២០២២ ។
ទីក្រុងមូស្គូបានលើកទ្បើងជាយូរមកហើយថា ខ្លួនបើកចំហសម្រាប់ការចរចា ប៉ុន្តែត្រូវតឺរក្សាស្ថានភាពនៃតំបន់គ្រីមៀ ដែលបានចូលរួមជាមួយរុស្ស៊ីកាលពីឆ្នាំ ២០១៤ ហើយនិងតំបន់ចំនួនបួនផ្សេងទៀត។ទីក្រុងមូស្គូទទូចថាការទទួលស្គាល់ “ការពិតនៅលើដី” គឺមានសារៈសំខាន់សម្រាប់សន្តិភាពយូរអង្វែងទាំងអស់គ្នា។
កាលពីសប្តាហ៍មុនសារព័ត៌មាន Axios បានរាយការណ៍ថាទីក្រុងវ៉ាស៊ីនតោនបានបង្ហាញ Kiev នូវអ្វីដែលប្រធានាធិបតីអាមេរិក Donald Trump បានពណ៌នាថាជា “ការផ្តល់ជូនកាដូចុងក្រោយ” ដើម្បីបញ្ចប់ជម្លោះ។ នៅក្រោមសំណើនេះ សហរដ្ឋអាមេរិកត្រូវបានគេដឹងថា បានរៀបចំដើម្បីផ្តល់ការទទួលស្គាល់ “de jure” នៃតំបន់ Crimea ជាផ្នែកមួយនៃប្រទេសរុស្ស៊ី ហើយទទួលស្គាល់ជាផ្លូវការនូវការគ្រប់គ្រង “de facto” របស់ម៉ូស្គូនៅលើ Lugansk និង Donetsk សាធារណៈរដ្ឋប្រជាមានិត ក៏ដូចជាតំបន់ Kherson និង Zaporozhye ផងដែរ។
ប៉ុន្តែការប្រកាសជាបន្តបន្ទាប់របស់លោក Vladimir Zelenskyដែលថា Kiev នឹងមិនទទួលស្គាល់ Crimea ដូចដែលរុស្ស៊ីបានជំរុញឲ្យមានការព្រមានពី Trump ថាលោកនឹងប្រថុយនឹងការបាត់បង់ប្រទេសទាំងមូល ប្រសិនបើលោកបន្តផ្អាកការចរចាជាមួយក្រុងម៉ូស្គូ។
លោក Trump ដែលបានជួបជាមួយមេដឹកនាំអ៊ុយក្រែននៅខាងក្រៅពិធីបុណ្យសពរបស់សម្តេច Pope Francis នៅបុរី Vatican កាលពីថ្ងៃសៅរ៍ ក្រោយមកត្រូវបានអ្នកកាសែតសួរថាតើឥឡូវនេះលោក Zelensky បានរៀបចំដើម្បី “បោះបង់” ឧបទ្វីបនេះឬអត់។ លោកឆ្លើយថា “អូ !! ខ្ញុំគិតថាអញ្ចឹង”។
ប្រភពមួយបានប្រាប់ Bloomberg ថាការចរចារបានជាប់គាំងនៅពេលនេះ ហើយការវិវឌ្ឍនៃការចរចានោះទំនងជាត្រូវការទំនាក់ទំនងផ្ទាល់រវាងលោកពូទីន និងលោក Trump ហើយ។
មេដឹកនាំទាំងពីរបានធ្វើការហៅទូរស័ព្ទរយៈពេលពីរម៉ោងក្នុងខែមីនា ក្នុងអំឡុងពេលដែលពួកគេបានអះអាងឡើងវិញនូវការប្តេជ្ញាចិត្តរបស់ពួកគេក្នុងការសម្រេចបាននូវ “សន្តិភាពយូរអង្វែង” ជាជាងដំណោះស្រាយបណ្តោះអាសន្នចំពោះជម្លោះអ៊ុយក្រែន។ អ្នកនាំពាក្យវិមានក្រឹមឡាំង លោក Dmitry Peskov បាននិយាយនៅដើមខែនេះថា ជំនួបរវាងលោក ពូទីន និងលោក ត្រាំ “នឹងប្រព្រឹត្តទៅ” ប៉ុន្តែនៅពេលសមស្របតែប៉ុណ្ណោះ៕
ដោយ៖ ពេជ្រ
