លោក Pep Munoz គ្រូបង្វឹកព្រះខ័នរាជស្វាយរៀង បានស្នើសុំលើកការប្រកួតមួយចំនួន ដើម្បីឱ្យកីឡាករបានសម្រាកនិងដើម្បីរៀបចំមុនការប្រកួតវគ្គផ្តាច់ព្រ័ត្រពានរង្វាន់ AFC Challenge League ជាមួយក្រុម FK Arkadag នៅថ្ងៃទី១០ ខែឧសភា ឆ្នាំ២០២៥មកដល់។
គ្រូបង្វឹកសញ្ជាតិអេស្ប៉ាញរូបនេះបានលើកឡើងបែបនេះនៅក្នុងសន្និសីទសារព័ត៌មានកាលពីល្ងាចថ្ងៃទី១៩ ខែមេសា ឆ្នាំ២០២៥ ដោយលោកសង្ឃឹមគណៈកម្មការរៀបចំការប្រកួតនៃសហព័ន្ធកីឡាបាល់ទាត់កម្ពុជាយោគយល់ និងផ្តល់ពេលវេលាសមរម្យសម្រាប់ត្រៀមខ្លួននេះ។
លោកបានបន្តថា ៖«ដោយសារយើងទើបតែដឹងមានការប្រកួតវគ្គផ្តាច់ព្រ័ត្រ នៅថ្ងៃទី១០ ខែឧសភា ពីព្រោះប្រកួតវគ្គពាក់កណ្តាលផ្តាច់ព្រ័ត្រចប់កាលពីថ្ងៃព្រហស្បតិ៍ទើបយើងដឹងថា យើងឡើងវគ្គផ្តាច់ព្រ័ត្រ។ ការប្រកួតវគ្គផ្តាច់ព្រ័ត្រគឺជាការប្រកួតដ៏សំខាន់ សង្ឃឹមថា ក្រុមផ្សេង និង CPL យោគយល់ និងលើកការប្រកួត។ យើងចង់មានពេលវេលាសមរម្យក្នុងការត្រៀមខ្លួន ដូច្នេះសង្ឃឹមថា ពួកគាត់លើកការប្រកួតសម្រាប់ក្លឹបព្រះខ័នរាជស្វាយរៀង»៕
